Birlesken Arab Ámirlikleriniń Dubay qalasında boks boyınsha eresekler arasındaǵı IBA yaǵnıy Xalıqaralıq boks assosaciyası tárepinen ótkerilip atırǵan Jáhán chempionatında keshe yarım final bellesiwleri bolıp ótti.

13 salmaq kategoriyası boyınsha ótkerilgen bellesiwlerdiń toǵızında mámleketimiz boksshileri final jollaması ushın ringke shıǵıwı tiyis bolsa, 75 kg da jarısqa qatnasıp atırǵan Fazliddin Erkinboev qolınan alǵan jaraqatı sebepli, jeńis onıń qarsılası qazaqstanlı Sabırjan Akkalikovqa nesip etti.
Al, 60 kg salmaqta bellesiwlerge qatnasıp atırǵan Abdumalik Xalokov, 67 kg da Asadxwja Mwydinxwjaev, 51 kg da Hasanboy Dwsmatov, 80 kg da Javohir Ummataliev, 92 kg da Twrabek Habibullaev, +92 kg da Arman Maxanov óz qarsılasların ájayıp tárizde jeńip, jáhán chempionatınıń finalına jol aldı.
54 hám 57 kg salmaqta ringke shıqqan Asilbek Jalilov hám Xwjanazar Nortojievlerge bul ret áwmet kúlip baqpadı hám Fazliddin Erkinboev sıyaqlı chempionattıń qola medalı menen qosa 75 mıń dollar menen sıylıqlandı.
Maǵlıwmat ushın aytıp ótiwimiz kerek, IBA tárepinen ótkerilip atırǵan bul jáhán chempionatında chempion 300 mıń, gúmis medal iyesi 150 mıń, 3-orın jeńimpazları 75 mıń hám 5-orındı alǵan boksshiler 10 mıń AQSh dolları menen sıylıqlanadı.
CHempionattıń final bellesiwleri 13-dekabr kúni bolıp ótedi hám onda Ózbekstan saylandı komandasınıń 6 boksshisi jeńimpazlıq ushın gúres alıp baradı.

Adilbay Orazov,
Qaraqalpaqstan xabar agentligi sholıwshısı