Elimizde «Insan qádiri ushın» principi tiykarındaǵı jumıslardı alıp barıw hám sol arqalı xalıqtıń razılıǵına erisiw búgingi kúni respublikamız húkimetiniń baslı maqsetine aylanǵan.

Sonlıqtan Qaraqalpaqstan Respublikası Joqarǵı Keńesiniń Baslıǵı basshısı alıs aymaqlarda xalıqtı qıynap kiyatırǵan mashqalalardı anıqlaw hám olarǵa unamlı sheshim tabıw maqsetinde, kóshe biyleri, máhálle belsendileri menen ushırasıwlar ótkerip, olardıń hal-jaǵdaylarınan xabar alıp kelmekte.
Usınday ushırasıw Nókis qalasınan derlik 100 km uzaqlıqta jaylasqan paytaxtımızǵa qaraslı Qarataw posyolkasında bolıp ótti.
Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev aymaqta jasawshı nuranıy-aqsaqallar, kóshe biyleri hám belsendiler menen ushırastı hám onda tiykarınan xalıqtıń tikkeley kewil-keypiyatına keri tásir etip turǵan mashqalalar, olardı unamlı sheshiw jolları boyınsha jaqınnan sáwbetlesti. Atap aytqanda, ushırasıwda puqaralar turaq jaylarınıń kadastr hújjetlerin rásmiylestiriw, aqaba suw tarmaǵı menen támiyinlew, sociallıq járdemler kórsetiw hám basqa da usı sıyaqlı turmıslıq mashqalalar boyınsha múrájat etip, onda hár bir kórsetilgen másele belgilep alındı hám tiyisli juwapkerlerge anıq tapsırmalar berildi.
Ótkerilgen ushırasıwda Qaraqalpaqstan Respublikası Prokurorı Sh.Aminov qatnastı.

Adilbay Orazov,
Qaraqalpaqstan xabar agentligi sholıwshısı.