Berdaq atındaǵı Qaraqalpaq mámleketlik universitetinde Koreya Respublikasınıń abıraylı joqarı oqıw orınlarınan biri – Far East universiteti delegaciyasınıń qatnasıwında ushırasıw bolıp ótti.

Bul ushırasıw universitetler arasında xalıqaralıq birge islesiw baylanısların bekkemlew hám akademiyalıq almasıw baǵdarların keńeytiwge qaratılǵan bolıp, táreplerdiń jańa basqıshtaǵı sóylesiwlerine jol ashtı.
Far East universiteti prezidenti Liu Kee Il basshılıǵındaǵı delegaciya aǵzaları eń dáslep miymanlar QMU oqıw imaratında KOICA agentligi tárepinen shólkemlestirilgen koreys tili orayına barıp, oraydıń jumısı, oqıw procesi hám koreys tilin úyreniwshi studentler ushın jaratılǵan sharayatlar menen jaqınnan tanıstı. Bul jerde koreys tili menen shuǵıllanıp atırǵan student-jaslar menen qızǵın sáwbet ótkerilip, olardıń bilim dárejesi, til úyreniw motivaciyası hám keleshektegi rejeleri haqqında pikirlesti hám jaslarımızdıń koreys tiline bolǵan qızıǵıwshılıq bilimlendiriwdiń sapası hám xalıqaralıq birge islesiwdiń rawajlanıp atırǵanın joqarı bahaladı.
Bunnan soń delegaciya basshıları Berdaq atındaǵı Qaraqalpaq mámleketlik universiteti rektorı wazıypasın waqıtsha atqarıwshı O.Dúysenbaev penen ushırasıp, sáwbetlesti.
Sáwbetlesiw barısında tárepler arasında bilimlendiriw, ilimiy-izertlew, studentler hám professor-oqıtıwshılar almasıwı, qospa baǵdarlamalardı ámelge asırıw sıyaqlı baǵdarlarda birge islesiwdi keńeytiw máseleleri dodalanıp, eki tárepleme birge islesiw boyınsha shártnamaǵa qol qoyıldı.
Álbette, dúzilgen bul kelisim birge islesiw keleshekte qospa joybarlar, akademiyalıq almasıw baǵdarlamaları, mádeniy-aǵartıwshılıq baylanıslardı bunnan bılay da rawajlandırıw ushın bekkem huqıqıy tiykar bolıp xızmet etedi.

Adilbay Orazov,
Qaraqalpaqstan xabar agentligi sholıwshısı