Muhammad al-Xorezmiy atındaǵı qánigelestirilgen mekteptiń Nókis filialında tiykarǵı pán olimpiadasınıń Qaraqalpaqstan Respublikası basqıshı jeńimpazların sıylıqlaw máresimi bolıp ótti.

Ilajda Qaraqalpaqstan Respublikası Mektepke shekemgi hám mektep bilimlendiriwi ministri Gúlistan Kojabaeva oqıwshılardı qolǵa kirgizgen joqarı nátiyjeleri menen qutlıqlap, olardı tárbiyalap atırǵan ata-analar hám ustazlarına minnetdarshılıq bildirdi hám oqıwshılardıń Ózbekstan Respublikası basqıshında da jeńimpaz bolıwına tilekleslik bildirdi.
Sońınan jeńimpaz oqıwshılar diplom hám aqshalay sıylıqlar menen sıylıqlanıp, birinshi orın iyelerine 2 472 000 sum, ekinshi orındı alǵanlarǵa 1 648 000 sum, sıylı úshinshi orındı jeńip alǵanlarǵa 1 236 000 sum saltanatlı túrde tapsırıldı.
Sonday-aq, ilajda ulıwma komandalıq orında da jeńimpazlar anıqlanıp, onda birinshi orındı Nókis qalası, ekinshi hám úshinshi orınlardı Tórtkúl hám Qońırat rayonları iyelewge miyasar boldı hám Nókis qalasına ministliktiń arnawlı diplomı hám kubogi tapsırıldı.
Saltanatlı keshe jas talantlılardıń koncert baǵdarlaması menen kewilli dawam etti.

Adilbay Orazov,
Qaraqalpaqstan xabar agentligi sholıwshısı