“Mámleketlik xızmette basqarıw nátiyjeliligin bunnan bılay da arttırıw ilajları haqqında”ǵı Prezident pármanına bola, mámleketlik uyımlarda xızmetkerlerdiń korrupciyaǵa qarsı turaqlılıq dárejesin diagnostikadan ótkeriw sisteması engiziledi.

2026-jıl 1-yanvardan korrupciyaǵa qarsı ishki qadaǵalaw strukturalarınıń basshı hám juwapker xızmetkerleri jáne usı lawazımlarǵa talabanlar, 2026-jıl 1-iyunnen tarawlardı qadaǵalawǵa juwapker inspekciyalarda korrupciyalıq qáwip-qáter dárejesi “joqarı” hám “orta” bolǵan funkciyalar júklengen lawazımlarda jumıs alıp barıp atırǵan xızmetkerler jáne usı lawazımlarǵa talabanlar, 2027-jıl 1-yanvardan basqa mámleketlik uyımlarda korrupciyalıq qáwip-qáter dárejesi “joqarı” hám “orta” bolǵan funkciyalar júklengen lawazımlarda jumıs alıp barıp atırǵan xızmetkerler hám usı lawazımlarǵa talabanlar diagnostikadan ótkeriledi.
Diagnostika Korrupciyaǵa qarsı gúresiw agentliginiń buyırtpasına muwapıq Basshı kadrlardı bahalaw orayı tárepinen ótkeriledi.
Diagnostika nátiyjesine bola, xızmetkerdiń korrupciyaǵa shıdamlılıq dárejesi “tómen” dep bahalanıwı usı lawazımda miynet qatnasıqların dawam ettiriwine tosqınlıq etetuǵın jaǵday esaplanadı.
Onda xızmetker korrupciyalıq qáwip-qáter dárejesi “tómen” bolǵan basqa lawazımǵa májbúriy túrde rotatciyalanadı. Bos bolǵan mámleketlik puqaralıq xızmeti lawazımların iyelewde jańasha sistema engiziledi
Pármanǵa bola, mámleketlik uyımlarda bos bolǵan mámleketlik puqaralıq xızmeti lawazımların iyelewde jańasha sistema engiziledi.
Oǵan bola, 2026-jıl 1-marttan mámleketlik puqaralıq xızmetinde bar bolǵan bos jumıs orınları haqqındaǵı maǵlıwmatlar “vacancy.gov.uz” elektron platformasında járiyalanadı. Puqaralarǵa ózlerine maqul bolǵan qánigelik, lawazım hám miynet haqıǵa baylanıslı talaplardı belgilegen halda “vacancy.gov.uz” elektron platformasında “jumıs izlewshi” statusında dizimnen ótiw imkaniyatı jaratıladı. “vacancy.gov.uz” elektron platformasında dizimnen ótken hám mámleketlik puqaralıq xızmetine kiriw boyınsha test sınaǵın tabıslı ótken puqaralar usı platformada bar bos jumıs orınlarına dawagerlik etiwi múmkin boladı.
Onda, puqaralarǵa test sınaqların shaxstı tastıyıqlaw hám sınaqlardı qadaǵalawdıń arnawlı onlayn sisteması arqalı yamasa Basqarıw nátiyjeliligi agentliginiń arnawlı úskenelengen xanalarında tapsırıw imkaniyatı jaratıladı. Test nátiyjeleri 1 jılǵa shekem ámel etedi. Tańlawdıń qosımsha basqıshı sıpatında ótkeriletuǵın tarawlıq bilimlerdi bahalaw boyınsha test sınaqları mámleketlik uyımlardıń buyırtpalarına muwapıq Agentlik janındaǵı Basshı kadrlardı bahalaw orayı tárepinen shártnama tiykarında ótkeriledi.
Pármanǵa bola, mámleketlik uyımlarda kadrlar rezervin júrgiziw boyınsha tómendegilerdi názerde tutatuǵın jańa tártip engiziledi. Mámleketlik uyımlar tárepinen Milliy kadrlar rezervine kirgizilgen lawazımlar ushın talabanlardıń dizimi erkin túrde qáliplestiriledi. Tańlap alıwdan ótken talabanlar tárepinen jeke rawajlanıw rejesiniń orınlanıwı “zaxira.bsa.uz” elektron platforması arqalı monitoring etiledi.
Potencial kadrlar rezervine talabanlar máhállede jumıs alıp barıp atırǵan máhálle baslıǵı, hákim járdemshisi, hayal-qızlar belsendisi, jaslar jetekshisi, sociallıq xızmetker hám salıq inspektorları arasınan rayon (qala) hákimleriniń juwmaǵı tiykarında jumısshı topar tárepinen tańlap alınadı.
Agentlik tárepinen mámleketlik puqaralıq xızmetiniń basqarıw hám siyasiy lawazım toparlarına rezerv erkin túrde qáliplestiriledi. Mámleketlik uyımlarda nátiyjeli xızmet etip atırǵan, biraq basshıları tárepinen usınıs etilmegen talabanlardı erkin anıqlaw hám bahalaw arqalı olar Milliy kadrlar rezervine kirgiziledi.

ÓzA