Birlesken Milletler Shólkemi (BMSh) Bas Assambleyasınıń 2003-jıl 21-noyabrdegi rezolyuciyasına muwapıq, 2004-jıldan baslap 9-dekabr – Xalıqaralıq korrupciyaǵa qarsı gúresiw kúni sıpatında belgilenedi.

Sáne múnásibeti menen dekabr ayında Xalıqaralıq korrupciyaǵa qarsı gúresiw aylıǵı ótkerilmekte.
Aylıq sheńberinde Huqıqtı qorǵaw akademiyasında “BMShtıń Korrupciyaǵa qarsı konvenciyası qatnasıwshı-mámleketleri konferenciyası modeli: ekinshi basqıshtı ámelge asırıw kózqarası” shólkemlestirildi.
Onda Oraylıq Aziya yuridikalıq joqarı bilimlendiriw mákemeleriniń tıńlawshılarınan ibarat 11 jámáát qatnastı.
Konferenciya eki basqıshtan ibarat bolıp, onda qatnasıwshılar BMSh konvenciyası boyınsha óz bilimlerin kórsetti.
Atap aytqanda, birinshi basqıshta qatnasıwshılar Nigeriya, Avstraliya, Germaniya, Portugaliya, Shveycariya, Sloveniya, AQSh, Ullı Britaniya, Irlandiya, Qubla Afrika hám Arqa Makedoniya mámleketleriniń shártli delegatları sıpatında BMSh konvenciyasınıń 55-statyası, yaǵnıy konfiskaciyalaw maqsetindegi xalıqaralıq birge islesiw qaǵıydalarınıń usı mámleketler nızamshılıǵında qollanılıwı boyınsha esabat berdi.
Konvenciyanıń 55-statyası qatnasıwshı-mámleketler óz aymaǵında jınayıy dáramatlardı, múlkti hám jınayat islew quralların konfiskaciyalaw haqqındaǵı múrájatlardı orınlaw hám orınlawǵa jiberiw, bunday múlklerdi anıqlaw, baqlaw, qamaqqa alıw hám de konfiskaciyalaw ushın ilajlar kóriw hám de usı statyanıń jaǵdayların hadal bolǵan úshinshi táreplerdiń huqıqlarına zıyan jetkeretuǵın tárizde talqılanbaw sıyaqlı qaǵıydalardı belgileydi.
Ilajdıń ekinshi bóliminde komandalar ózleri qorǵap atırǵan sırt eldiń tájiriybesi tiykarında óz mámleketlerinde konfiskaciyalaw maqsetinde xalıqaralıq birge islesiw qaǵıydaların támiyinlewge qaratılǵan usınıslar arqalı milliy nızamshılıqtı jetilistiriw boyınsha shıǵıp sóyledi.
Shártli delegatlardıń esabatları hám usınısları Bas prokuratura, BMSh hám GIZdiń tarawǵa baylanıslı ekspert-qánigeleri tárepinen bahalanıp barıldı.
Bul ilaj studentlerge BMShtıń Korrupciyaǵa qarsı konvenciyası hám aldınǵı sırt el konfiskaciyalaw máselelerinde xalıqaralıq birge islesiwdi rawajlandırıw máselelerin tereń úyreniw hám bul baǵdardaǵı bilim hám kónlikpelerin arttırıwǵa járdem berdi.

N.Abduraimova, ÓzA