Senat komitetlerinde “2026-jıl ushın Ózbekstan Respublikasınıń mámleketlik byudjeti haqqında”ǵı nızam keńnen dodalanbaqta.

Jaslar, hayal-qızlar, mádeniyat hám sport máseleleri komiteti májilisinde dáramatı biraz artqan, biraq kámbaǵallıq shegarasında turǵan shańaraqlardı hár tárepleme qollap-quwatlaw maqsetinde “sociallıq paket” engiziw belgilenetuǵını atap ótildi.
Júriw, juwırıw, mini-futbol, velosport, badminton, stritbol hám “Workout” sport túrlerin ǵalaba en jaydırıw hám rawajlandırıw baǵdarlamaların ámelge asırıw maqsetleri ushın 85 milliard sum qaratılıwı názerde tutılmaqta.
Mámleketlik teatrlar mámleketlik byudjet qarjıları esabınan mámleketlik buyırtpanı orınlaw shárti menen basqıshpa-basqısh joybarlıq qarjılandırıw sistemasına ótiwi belgilenbekte.
Jaslardıń startap joybarların qollap-quwatlaw maqsetinde eń aldınǵı texnologiyalardı alıp kelip, 100 jergilikli startaptı xalıqaralıq kólemde tartımlı bizneske aylandırıw ushın 50 milliard sum qaratılmaqta.
***
Ilim, bilimlendiriw hám densawlıqtı saqlaw máseleleri komiteti májilisinde 2026-jılı bilimlendiriw hám ilim tarawına 102,7 trillion sum, densawlıqtı saqlaw tarawınıń qárejetlerine 48,9 trillion sum ajıratılıwı rejelestirilip atırǵanı atap ótildi.
Atap aytqanda, ulıwma bilim beriw mekteplerin sabaqlıq, shınıǵıw dápteri hám oqıw-metodikalıq qollanbalar menen támiyinlew ushın 2026-jılı derlik 2 trillion sum yamasa 2025-jılǵa salıstırǵanda 53 procentke kóbirek qarjı qaratıw názerde tutılmaqta.
Komitet májilisinde balalarǵa kórsetilip atırǵan medicinalıq járdemniń sapasın jaqsılaw boyınsha kórilip atırǵan ilajlar boyınsha Densawlıqtı saqlaw ministrligine jiberilgen parlamentlik soraw nátiyjeleri de dáslepki tárizde dodalandı.
Respublika boyınsha 4 mıń 247 orınnan ibarat 13 aymaqlıq balalar kóp tarmaqlı medicina orayı shólkemlestirilgen. Ótken jılı respublika boyınsha 18 jasqa shekemgi balalardıń 95,5 procenti medicinalıq tekseriwden ótkerilip, olardıń 28,8 procentinde túrli kesellikler anıqlanǵan. Olardı salamatlandırıw ilajları kórilgen.
Medicinada úsh buwın (birlemshi, ekilemshi hám respublikalıq oraylar) arasında maǵlıwmatlar almasıw imkaniyatın beretuǵın Birden-bir medicinalıq málimleme sisteması engizilgen.
Senatorlar balalarǵa kórsetilip atırǵan medicinalıq járdemniń sapasın jaqsılaw hám tarawǵa ilim jetiskenliklerin engiziw boyınsha sheshiliwi kerek bolǵan ayırım máseleler áhmiyetliliginshe qalıp atırǵanın atap ótti. Atap aytqanda, kópshilik baslanǵısh sistema emlewxanalarında balalar xirurgiyalıq bólimleri shólkemlestirilmegen, sonday-aq, Qaraqalpaqstan Respublikası hám aymaqlıq balalar kóp tarmaqlı medicina oraylarınıń xirurgiyalıq bólimlerinde joqarı texnologiyalı xirurgiyalıq ámeliyatlar jolǵa qoyılmaǵan.
Balalar stacionar emlenetuǵın emlew-profilaktika mákemeleri jáne mektepke shekemgi hám mektep bilimlendiriwi mákemeleriniń medicina xanaların dári-dármaq penen tolıq támiyinlew mexanizmlerin jetilistiriw boyınsha zárúr ilajlar kórilmegen.
Dodalaw juwmaǵında tiyisli qararlar qabıl etildi.

N.Abduraimova,
ÓzA