Kegeyli rayonında toy hám basqa da shańaraqlıq máresimlerdi ıqshamlastırıwǵa baǵıshlanǵan májilis bolıp ótti.
Oǵan máhálle jetiligi wákilleri, kóshe biyleri, hayal-qızlar belsendileri hám ómiri dawamında kópti kórgen, tájiriybeli nuraniylar qatnastı.

Ilajda rayondaǵı bir topar juwapker shólkemlerdiń basshıları shıǵıp sóylep, toy-merekelerdi ıqshamlastırıw boyınsha ózleriniń pikir-usınısların bildirdip, rayondaǵı bir qatar shólkemler óz-ara kelisken halda, túsinisiw memorandumın tastıyıqladı.
Onda belgilengen tártipke bola, 2026-jıldan baslap Kegeyli rayonında toy hám basqa da shańaraqlıq máresimler zamanagóy tártip boyınsha ıqshamlastırıladı. Atap aytqanda, engizilejaq jańa tártipke bola, endigiden bılay saltanatlı toylar hám basqa da shańaraqlıq máresimler tek ǵana 1 kún, azanǵı saat 6:00 den keshki saat 11:00 ge shekem ótkeriledi. Toy-merekelerdi ótkeriwde kóshe biyleriniń wazıypası kúsheytilip, olar toy iyesi menen birge puqaralar jıyınına baradı hám ruqsat aladı. Awıllıq jerlerde 250-300 adamǵa ruqsat berilip, dábdebeli, kim ozarǵa beriletuǵın toylar toqtatıladı. Jaslar seyiline shıǵatuǵın kelin-kúyewler ushın tek ǵana 3 avtomashina júriwine ruqsat etiledi. Sonday-aq, toy ótkeriletuǵın restoran, toyxana, toy basqarıwshıları hám mádeniy xızmet kórsetiwshi artistler menen toy iyesi arasında shártnama dúzilip, olar usı dúzilgen shártnama tiykarında xalıqqa xızmet kórsetedi.
– Burın rayonımızda bir kún burın qonıq, búgin toy, erteń quda shaqırıq, jaslar toyı dep 3 kúnlep waqtın ketirip júretuǵın edi, – deydi «Nuranıy» qorı rayonlıq bóliminiń baslıǵı Tajetdin Dawletov. – Endigiden bılay milliyligimizge sáykes kelmeytuǵın «godik toy», 40-50 jasqa shıqqan yubiley toy, oqıwǵa kirgen shashıw toylar, marhumnıń «jetisi», «qırqı», «júzi», «jılı» sıyaqlı máresimler ótkerilmeydi. Ulıwma máresimlerdiń tártipli ótkeriliwin támiyinlew aymaqlardaǵı ishki isler bólimi hám basqa da juwapker shólkemlerge tapsırılmaqta.

Adilbay Orazov,
Qaraqalpaqstan xabar agentligi sholıwshısı