Múnásibet

Ózbekstan Respublikasınıń mámleketlik nıshanları xalqımızdıń milliy maqtanıshın, tariyxın hám keleshekke bolǵan bekkem isenimin sáwlelendiredi. Olardıń arasında Mámleketlik gimn ayrıqsha orın iyeleydi. Ol elimizdiń júreginde jaylasqan muqaddes qosıq bolıp esaplanadı. Ol hár bir watanlasımızdıń qálbinde Watanǵa muhabbat hám sadıqlıq sezimlerin oyatıp, xalqımızǵa tán joqarı pazıyletlerdi qádirlewge shaqıradı.
1992-jıldıń 10-dekabr kúni “Ózbekstan Respublikasınıń Mámleketlik gimni haqqında”ǵı Nızam qabıl etildi. Búgin mine, usı tariyxıy sánege 33 jıl toldı. Bul sáne hár bir puqaranıń qálbinde áhmiyetli qádiriyat sıpatında mórlenip qalǵan. Sebebi gimn – bul xalıqtıń arzıw-niyetleri, birden-bir maqset hám bekkemlengen birliginiń kórinisi.
Gimn jańlaǵanda hár bir puqaranıń qálbinde Ana – Watanǵa bolǵan ayrıqsha mehir hám maqtanısh sezimi payda boladı, ıqtıyarsız nama seslerine qosıp atqaradı. Bul sezimler hár bir insandı mámleketimizdiń rawajlanıwı jolında pidákerlik penen xızmet etiwge, jáne de belsendi bolıwǵa shaqıradı.
Ásirese, sport maydanlarında, Olimpiada arenalarında jeńimpaz sportshılarımız bayraǵımızdı kóklerge kóteriw menen birge, gimnimizdiń hawazların dúnyaǵa jańlatıp atırǵanı – elimizdiń abırayı, xalqımızdıń dańqı qanshelli joqarı ekenin kórsetedi. Bul maqtanıshlı demlerdi kóz kórip, júrek sezgende, hár birimiz Watannıń ajıralmas bólegi ekenimizden jáne bir márte maqtanamız.
Gimnimiz – xalqımızdıń ruwxın, tábiyatın, qúdiretin sáwlelendirgen biybaha muzıkalıq shıǵarma. Onıń hawazında xalqımızǵa tán miynet súygishlik, mártlik hám jigerlilik, quwanısh hám jaqsılıq ómiri jámlengen. Sonıń ushın onnan balalar da, nuraniy kekseler de birdey ruwxlanadı.
Mámleketlik gimn jas áwladtıń tárbiyasında úlken áhmiyetke iye – olardı Watanǵa muhabbatlı, ruwxıy jaqtan joqarı hám fizikalıq jaqtan salamat bolıp ósiwge jetekleydi.
Hár kúni azanda bilimlendiriw mákemelerinde, bayramlarda yamasa úlken ilajlarda gimn jańlawı – bul Watannıń abırayın bárqulla júrekte saqlaw, ǵárezsizlik ideyalarına sadıqlıq penen jasawǵa shaqırıw bolıp esaplanadı.
Gimn – tınıshlıq, tatıwlıq, abadanlıq jolında birgelikte háreket etiwge hám keleshekti birgelikte qurıwǵa iytermeleytuǵın qúdiretli ruwx deregi.
Ulıwmalastırıp aytqanda, gimnimiz tek ǵana qúdiretli muzıkalıq shıǵarma emes, al úlken maqsetlerge jetekleytuǵın ideologiyalıq kúsh, xalqımızdıń birligi hám awızbirshiliginiń tımsalı bolıp esaplanadı. Hár bir qatarında muqaddes Watanǵa sheksiz muhabbat, maqtanısh hám eldiń rawajlanıwına qaratılǵan iygilikli ideyalar jámlengen.
Gimnimizdiń hár bir qatarı naması qálbimizde hámiyshe jańlasın!

Janar Alieva,
Xalıq deputatları Shımbay rayonlıq Keńesiniń deputatı,
rayondaǵı 17-sanlı ulıwma bilim beriw mektebiniń direktorı.
Qaraqalpaqstan xabar agentligi