Respublikamız boylap, atmosfera hawasına zıyanlı shıǵındılar shıǵarıp atırǵan dereklerdi anıqlaw hám saplastırıw maqsetinde reyd ilajları ótkerilmekte.

Ilajda Qaraqalpaqstan Respublikası Ekologiya basqarması, Prokuratura, Ishki isler hám Milliy gvardiya xızmetkerlerinen ibarat jumısshı topar tárepinen qala hám rayon aymaǵında jaylasqan kárxanalarda reyd ilajı ótkerildi.
Operativ ilaj dawamında Nókis qalası aymaǵında pisken gerbish islep shıǵarıw cexları hám ıssıxanalarda úyreniw jumısları alıp barılmaqta. Úyreniwler dawamında qorshaǵan ortalıqqa zıyan jetkeriw jaǵdayları anıqlanıp, olardıń basshılarına tiyisli eskertiw xatları berilip, jumısı waqıtsha tazalaw úskenesi tolıq iske qosılǵansha toqtatıldı. Íssıxana basshılarına kómirdiń tútinsiz janıwın hám tazalaw úskeneleriniń turaqlı islewin qadaǵalaw boyınsha tiyisli kórsetpeler berilip, qadaǵalawǵa alındı.
Bul jaǵday boyınsha juwapkerlerge bar kemshiliklerdi saplastırıw, ekologiyalıq qáwipsizlik talaplarına qatań ámel etiw hám xalıqqa qolaylı jasaw ortalıǵın jaratıwǵa qaratılǵan wazıypalar belgilep berildi.
Búgingi kúnde ekologiyalıq ortalıqtı jaqsılaw, qorshaǵan ortalıqqa zıyan keltiretuǵın faktorlardı azaytıw hám xalıq ushın qolaylı ekologiyalıq sharayat jaratıw maqsetinde úyreniw jumısları dawam etpekte.

Qaraqalpaqstan xabar agentligi