Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında da 10-dekabr – Ózbekstan Respublikası Mámleketlik gimni qabıl etilgen kún múnásibeti menen ruwxıy-aǵartıwshılıq ilaj shólkemlestirildi.

Azanǵı sap tartıwda professor-oqıtıwshılar, xızmetkerler hám student-jaslar bir qatarǵa dizilip, mámleketlik gimndi atqardı.
Mámleketlik gimn – xalıqtıń ózligin, ruwxıy birligin, milliy qádiriyatların jámlegen ullı qosıq. Ilaj dawamında gimnniń mazmun-mánisi, tariyxı, onıń jaslar tárbiyasındaǵı ornı, Watan aldındaǵı juwapkershilik sezimin qáliplestiriwdegi áhmiyeti haqqında pikirler bildirildi.
Álbette, bársheniń bir hawazda atqarǵan gimni hár bir puqaranıń kewilinde watansúyiwshilik sezimin kúsheytip, maqtanısh oyatadı. Qatnasıwshılar ushın bul sáne tek ǵana rásmiy ilaj emes, al milliy birlik hám awızbirshilik tımsalın tereń seziw imkaniyatına aylandı.

Qaraqalpaqstan xabar agentligi