Elimizde bolıp atırǵan jańalanıw processlerinde insan qádiri, onıń qádir-qımbatın ústin biliw reformalardıń tiykarǵı mazmun-mánisine aylandı.

Ózbekstan Respublikası Prezidenti Shavkat Mirziyoevtiń Ózbekstan Respublikası Konstituciyası qabıl etilgeniniń 33 jıllıǵı múnásibeti menen mámleketimiz tárepinen alıp barılıp atırǵan insanıylıq siyasatınıń ámeliy tastıyıǵı sıpatında “Jaza múddetin ótep atırǵan, qılmısına shın kewilden pushayman bolǵan hám dúzeliw jolına bekkem ótken bir topar shaxslardı ápiw etiw haqqında”ǵı pármanı qabıl etilgeni elimizdegi jańalanıw processleriniń insanıylıǵınan dárek beredi.
Xalqımız ázelden adamgershilik, keńpeyillik, miyrim-shápáát hám keshirimlilik sıyaqlı ullı pazıyletlerdi turmıs ólshemine aylandırıp kelgen. Qátelesken insannıń durıs jolǵa qaytıwına iseniw, onı qollap-quwatlaw, imkaniyat hám úmit beriw sıyaqlı jaqsı dástúr elimizde búgin de dawam etpekte.
Ózbekstan Respublikası Bas ministriniń orınbasarı – Shańaraq hám hayal-qızlar komitetiniń baslıǵı Zulayho Mahkamova bul hújjet boyınsha tómendegi pikirlerdi bildirdi.
– Mámleketimiz basshısı tárepinen hár jılı qutlı bayramlar aldınan ápiw etiliwi mine usı xalıqshıl qádiriyatlardıń ámeldegi ayqın kórinisi.
Bul ámeliyat insan qádirin joqarı qoyıw, jámiyetimizdiń ruwxıy-aǵartıwshılıq pákleniwi, keńpeyilligi hám ádillikke sadıqlıǵın sáwlelendiredi.
Usı mániste, Ózbekstan Respublikası Prezidentiniń “Jaza múddetin ótep atırǵan, qılmısına shın kewilden pushayman bolǵan hám dúzeliw jolına bekkem ótken bir topar shaxslardı ápiw etiw haqqında”ǵı pármanı járiyalanǵanı mine usı ullı dástúrdiń ózine tán dawamı bolıp esaplanadı.
Konstituciya qabıl etilgen kún múnásibeti menen ápiw etilgenler qatarında 29 hayal-qızlarımızdıń bar ekenligi bolsa, ayrıqsha quwanıshlı. Sebebi hayaldıń jámiyet hám shańaraqtaǵı ornı, perzent tárbiyasındaǵı juwapkershiligi sheksiz.
Qılmısınan shın kewilden pushayman bolıp, durıs jolǵa qaytıwǵa bekkem bel baylaǵan bul hayallar ushın ápiw – jańa ómir baslaw, shańaraǵınıń qushaǵına qaytıw ushın júdá úlken imkaniyat.
Usı jerde oyshıl alım Axmed Yugnakiydiń “Tuwrı bol, tuwrı is et, xalıq seniń tuwrı jolda ekenińizdi bilsin” degen hikmetin tilge alıw orınlı.
Haqıyqatında da, bul mazmunlı úgit insandı hár bir ámelde durıslıq hám páklikke shaqıradı. Durıs jol tanlaǵan, hadal niyet penen jasaǵan insandı jámiyettiń ózi tán aladı.
Mámleketimiz tárepinen berilip atırǵan isenim, bárinen burın, insan qádirin ulıǵlaw principiniń ámeliy úlgisi bolıp esaplanadı. Shańaraq hám hayal-qızlar komiteti bul hayal-qızlardıń turmısqa qayta beyimlesiwi, óz ornın tabıwı, shańaraǵı menen bekkem qatnasıqlardı tiklewi ushın zárúr járdem hám kómek kórsetiwdi dawam ettiredi.
Janajan Watanımızda insan qádirin joqarılatıw, ádillik hám miyrim-shápáát principlerine sadıqlıq bárqulla ústin bolıp qalsın.

Nazokat USMONOVA, ÓzA