Ózbekstan Milliy akkreditaciya sisteması

“Ózbekstan akkreditaciya orayı” MUK baspasóz xızmetiniń málim etiwinshe, usı jılǵı Global sapa infrastrukturası indeksi nátiyjesine bola, Ózbekstan akkreditaciya xızmeti 185 mámleket arasında 29-orındı iyeledi.
Ótken jılı “Ózbekstan akkreditaciya orayı” MUK (ÓZAKK) 39-orında bolǵan edi.
Global sapa infrastrukturası indeksi milliy sapa infrastrukturası sistemalarınıń rawajlanıwın bahalaw ushın innovaciyalıq qural bolıp esaplanadı. Ol Mesopartner tárepinen Germaniya Ekonomikalıq birge islesiw hám rawajlanıw federal ministrligi (BMZ) hám Germaniya Federal fizika-texnika institutı (PTB) járdeminde islep shıǵılǵan bolıp, dúnya boylap 185 ekonomikanı bahalaydı.
Indeks siyasatshılar, sapa infrastrukturası qánigeleri, izertlewshiler hám qarjılandırıw agentlikleri ushın bahalı maǵlıwmat deregi esaplanadı. 2025-jılǵı esabatta jámiyetshilikke ashıq maǵlıwmatlar tiykarında jańalanǵan analitikalıq nátiyje usınıs etilgen. Sonıń menen birge, sapa infrastrukturasın global sawda, turaqlı rawajlanıw hám texnologiyalıq ózgerisler menen baylanıstıratuǵın jańa tendenciyalar atap ótilgen.
Maǵlıwmat ornında aytıw kerek, “Ózbekstan akkreditaciya orayı” MUK 6 jıl dawamında jumıs alıp barıp kelmekte. Qısqa waqıt ishinde Oray xalıqaralıq tán alıwǵa eristi hám ILAC MRA / IAF MLA Kóp tárepleme Kelisimlerine qol qoydı. Házirgi waqıtta bolsa IAF/ILAC tiykarında jańadan shólkemlestirilgen GLOBAC xalıqaralıq shólkemi tárepinen tán alınǵan.
Búgingi kúnde ÓZAKK 15 baǵdarda xalıqaralıq standartlar boyınsha xızmet kórsetip kelmekte, 2026-jılı jáne 6 xalıqaralıq standart boyınsha jańa sxemalardı engiziw rejelestirilgen.

Shahnoza Mamaturopova, ÓzA