Beruniy rayonınıń Shabbaz awıl puqaralar jıyını aymaǵında jaylasqan “Azat intensiv baǵ” fermer xojalıǵında miyweli baǵ-júzimzarlardı keńeytiw, barları haqqında maǵlıwmatlardı elektron platformaǵa kirgiziw hám gúzgi agrotexnikalıq ilajlardı sapalı shólkemlestiriw boyınsha kórgizbeli ámeliy seminar bolıp ótti.

Ilajda Ózbekstan Respublikası Awıl xojalıǵı ministrligi janındaǵı Agrosanaattı rawajlandırıw agentligi, sonday-aq, onıń Qaraqalpaqstan Respublikası hám Xorezm wálayatı bólimlerinen juwapker qánigeler qatnasıp, baǵshılıqta aldınǵı texnologiyalardı engiziw boyınsha ámeliy túsinikler berildi.
Seminar dawamında júzim nállerin gúzgi suwıqlardan qorǵawdıń zamanagóy, únemli hám nátiyjeli usılları boyınsha tájiriybe shınıǵıwları ótkerilip, fermerler hám qánigelerge ámeliy kórsetpeler berildi.
Ilaj usı baǵdarda xızmet kórsetip atırǵan fermer xojalıqları ushın tájiriybe almasıw, ilimiy tiykarlanǵan usıllardı ámeliyatqa engiziw hám ónimdarlıqtı arttırıwda áhmiyetli orın ieleydi.

Qaraqalpaqstan xabar agentligi