Tutınıwshılarǵa úzliksiz túrde tábiyǵıy gaz jetkerip beriw «Hududgaz Qaraqalpaqstan» gaz támiynatı filialınıń tiykarǵı wazıypalarınan sanaladı.

Filial tárepinen xalıqqa óz waqtında tábiyǵıy gaz jetkerip beriwdiń sapasın jáne de jaqsılaw maqsetinde jılıtıw mapazı dáwirinde tábiyǵıy gaz jetip barıwı qıyın, mashqalalı aymaqlar aldın ala úyrenilip, olar mánzilli baǵdarlamaǵa kirgizilip qurılıs-ońlaw, rekonstrukciyalaw jumısları rejelestirilgen.
2025-2026-jılǵı gúzgi-qısqı máwsimge puqta tayarlıqlar kóriw ushın filialdıń barlıq qalalıq hám rayonlıq bólimleri tárepinen qurılıs-ońlaw basqaraması menen birgelikte orınlarda belgilep alınǵan reje-grafik tiykarında gaz tarmaqların máwsimge tayarlaw jumısları alıp barıldı.
– 5672 jeke tutınıwshı hám 94 kótere tutınıwshılar jaylasqan Taxtakópir rayonında da 2025-2026-jılǵı gúzgi-qısqı máwsimge tayarlıq kóriw maqsetinde iri ońlaw, qurılıs, rekonstrukciyalaw jumısları alıp barıldı, – deydi Taxtakópir rayonlıq gaz támiynatı bóliminiń baslıǵı Alisher Andigenov.
Rayondaǵı Taxtakópir, Ǵárezsizlik, Aydın jol, Dáwir, Atakól, Aǵıtay Ádilov hám Múlk awıl hám mákan puqaralar jıyınları aymaqlarındaǵı tutınıwshılardı tábiyǵıy gaz benen támiyinlep turǵan d-273 mm.lik jer astı gaz tarmaǵı tozıwı jetip aymaq turǵınlarına gúzgi-qısqı máwsimde tábiyǵıy gaz basımı menen baylanıslı mashqalalardı payda etip atır edi. Usı mashqalalardı saplastırıw hám xalıqqa úzliksiz túrde tábiyǵıy gaz jetkerip beriwdi jaqsılaw maqsetinde jámi 4,1 kilometrlik gaz tarmaqların rekonstrkciyalaw jumısları alıp barıldı.
Jer astındaǵı gaz tarmaqları jerdiń ústine shıǵarılıp, jańadan d-219 mm.lik gaz tarmaqları tartıldı. Nátiyjede usı aymaqtaǵı tutınıwshılardıń gaz támiynatı jaqsılanıwına erisildi.

Á.Jiyemuratov,
Qaraqalpaqstan xabar agentligi.