Nókis mámleketlik texnika universitetinde 8-dekabr – Ózbekstan Respublikası Konstituciyası qabıl etilgen kún hám Bas Nızamımızdıń 33 jıllıǵına baǵıshlanǵan saltanatlı ilaj bolıp ótti. Bul ilaj jas áwladtıń huqıqıy sawatlılıǵın arttırıw, olardı belsendi puqara sıpatında qáliplestiriw hám Watanımızdıń rawajlanıwına óz úlesin qosıw sezimin kúsheytiwge qaratılǵan áhmiyetli qádem boldı.

Ilaj Ózbekstan hám Qaraqalpaqstan Respublikalarınıń mámleketlik gimnleriniń atqarılıwı menen baslandı.
Ilajda Qaraqalpaqstan Respublikası Joqarǵı Keńesiniń komitet baslıǵı Murat Atamuratov, Májbúriy orınlaw byurosı Qaraqalpaqstan Respublikası basqarmasınıń aǵa inspektorı Begdiyar Utebaev, Milliy gvardiya Qaraqalpaqstan Respublikası boyınsha basqarması baslıǵınıń orınbasarı Umidjon Avezov, sonday-aq, professor-oqıtıwshılar hám student-jaslar qatnastı.
Ilajda shıǵıp sóylegen qánigeler Konstituciyanıń hár bir puqara ushın turmıslıq áhmiyetke iye qaǵıydaları, jańa redakciyadaǵı normalardıń mazmun-mánisi hám olar arqalı bekkem huqıqıy mámleket qurıwda qoyılǵan qádemler haqqında toqtap ótti. Atap aytqanda, insan huqıqları hám erkinlikleri tarawındaǵı reformalar mámleketti demokratiyalıq rawajlanıwdıń jańa basqıshına alıp shıqqanı ayrıqsha atap ótildi. Bas nızamda “insan – jámiyet – mámleket” principiniń ústinligi búgingi mámleketlik siyasatta insan mápi birinshi orında turatuǵının kórsetedi.
– Jańa redakciyadaǵı Konstituciya puqaralardıń huqıqıy sanasın arttırıw, jaslarımızdı huqıqıy belsendilikke shaqırıw hám olardı joqarı maqsetlerge umtılıwǵa iytermelewde áhmiyetli qural bolıp esaplanadı, – dedi universitettiń oqıw isleri boyınsha prorektorı R.Óteniyazov. – Sebebi hár bir insan óz huqıqların ańlap, puqaralıq juwapkershiligin túsinip júrse, bul mámleketimizde nızam ústinligi hám demokratiyalıq principlerdiń bekkemleniwine xızmet etedi.
Ilaj juwmaǵında mámleketimizde jaslar ushın jaratılıp atırǵan keń imkaniyatlar, olardıń bilim, sheberlik hám jetik insan sıpatında kamalǵa keliwinde Konstituciyanıń belgilep bergen normaları áhmiyetli tiykar bolıp xızmet etip atırǵanı atap ótildi.

Qaraqalpaqstan xabar agentligi