Ózbekstan Respublikası Prezidenti janındaǵı Perspektivalı kadrlardı tayarlaw boyınsha “El-yurt umidi” qorınıń 2025-jıl 2-ashıq stipendiya tańlawı sheńberinde test sınaqları ótkerildi.

Qordıń málimleme xızmetinen málim etiwinshe, barlıq processler ashıq-aydınlıq, teńlik hám inklyuzivlik principleri tiykarında shólkemlestirildi.
Ekinshi ashıq stipendiya tańlawı sheńberinde 12-26-noyabr kúnleri hújjetlerdi qabıl etiw tek ǵana ONE ID milliy sanlı identifikaciya sisteması menen integraciyalanǵan onlayn platforma arqalı ámelge asırıldı.
Hújjetlerdi qabıllaw dáwirinde platformada 6 mıńnan aslam paydalanıwshı dizimnen ótti, bul bolsa jámiyetshilik arasında úlken qızıǵıwshılıq oyatqanın kórsetti.
Hújjet tapsırǵanlardıń 59 procenti bakalavr, 34 procenti magistratura hám 7 procenti doktorantura tálim baǵdarı boyınsha dúnyanıń “Top-300” universitetlerinen qabıllaw xatların alǵan.
Talabanlar 21 mámlekettegi universitetlerden qabıllaw xatların alǵan. “Top-5” mámleketler qatarında – Ullı Britaniya, AQSh, Avstraliya, Italiya hám Qubla Koreya bar.
2-ashıq stipendiya tańlawı ushın 277 kvota ajıratılǵan bolıp, sonnan 105 i bakalavriat, 122 si magistratura, 50 i doktorantura boyınsha bólistirilgen.
Tańlaw komissiyası tárepinen dáslepki tańlawdan tabıslı ótken 480 den aslam talabannıń gezektegi basqıshta qatnasıwına ruqsat berildi.
Test sınaqları Bilim hám mamanlıqlardı bahalaw agentligi tárepinen ótkerildi. Testler talabanlardıń intellektuallıq potencialın, analitikalıq hám sın kózqarastan pikirlew qábiletin, psixologiyalıq turaqlılıǵın bahalawǵa qaratıldı.
Talabanlarǵa qolaylıq jaratıw maqsetinde olarǵa test sınaqlarında oflayn (eger Ózbekstan aymaǵında bolsa) hám onlayn (eger shet elde bolsa) túrinde qatnasıw imkaniyatı berildi. Bunnan tısqarı, test tapsırıw punktleri tek ǵana Tashkent qalasında emes, al Qaraqalpaqstan Respublikası hám wálayatlarda da shólkemlestirildi. Bul talabanlarǵa tikkeley óz aymaqlarında sınaqtan ótiw arqalı waqıt hám qarjıların únemlew imkaniyatın berdi.
Test sınaqlarında 315 talaban qatnastı, olardan 155 i test ushın belgilengen eń joqarı – 100 balldan keminde 61 ball toplap, sáwbetlesiw basqıshına tabıslı ótti.
Sonday-aq, 148 talaban 1-ashıq stipendiya tańlawı sheńberinde test sınaqlarınan azat etildi. Tańlaw rejesine muwapıq, tańlawdıń birinshi basqıshınan tabıslı ótken hám belgilengen múddette óziniń akademiyalıq potencialın tastıyıqlawshı ámeldegi xalıqaralıq sertifikatlardı (SAT, GRE, GMAT, A-Level) usınǵan talabanlar test sınaqlarınan azat etiledi. Olar keyingi basqısh – sáwbetlesiwde qatnasıw huqıqın qolǵa kirgizdi.
Esletip ótemiz, “El-yurt umidi” qorı 2025-jıl 1-ashıq stipendiya tańlawınıń nátiyjesine bola, 173 talaban “Ózbekstan Respublikası Prezidentiniń “El-yurt umidi” stipendiyası jeńimpazı” dep tán alındı. Olardıń 70 procenti dúnyanıń “TOP – 100” dizimindegi universitetlerine kirgen jaslar bolıp esaplanadı. Bul stipendiatlardıń sapa jaǵınan jańa quramı.
Qatań miynet etip, óz ústinde islep, dúnyanıń eń jaqsı universitetleri – Kembridj, Pensilvaniya, Seul milliy universiteti, Nyu-York, London, Gonkong, Dyuk universitetleri sıyaqlı abıraylı joqarı oqıw orınlarına kiriwge eriskenler qollap-quwatlandı.

N.Abduraimova, ÓzA