Sońǵı jılları elimizde Prezidentimiz basshılıǵında Korrupciyaǵa qarsı gúresiw baǵdarında bir qatar unamlı isler ámelge asırılmaqta. Mámleketimiz basshısı tárepinen ótkerilgen Korrupciyaga qarsı gúresiw boyınsha Milliy keńesinde belgilep berilgen wazıypalar sheńberinde Korrupciyaǵa qarsı gúresiw agentligi hám «Adolat» social-demokratiyalıq partiyasi tárepinen «10-noyabr-10-dekabr kúnleri aralıǵı respublikamızda Korrupciyaǵa qarsı gúresiw aylıǵı» dep járiyalandı.

Aylıq sheńberinde elimizdegi densawlıqtı saqlaw shólkemlerinde “Densawlıqtı saqlaw sistemasın “korrupciyasız taraw”ǵa aylandırıw – tiykarǵı wazıypamız!” súreni astında úgit-násiyat ilajları ótkerilmekte.
Usınday aǵartıwshılıq ilajı Nókis qalasındaǵı 8-sanlı shańaraqlıq poliklinikasında da ótkerilip, oǵan Qaraqalpaqstan Respublikası Densawlıqtı saqlaw ministrliginiń juwapker wákilleri, medicina xızmetkerleri hám ǵalaba xabar quralları wákilleri qatnastı.
Onda Qaraqalpaqstan Respublikası Densawlıqtı saqlaw ministrliginiń bas yuriskonsultı Jiyenbay Allaniyazov, ministrliktiń Múrájatlar menen islesiw bólimi bas qánigesi, tarawda korrupciyaǵa qarsı ishki qadaǵalaw strukturası xızmet wazıypaların orınlawshı Roza Qaypnazarovalar shıǵıp sóylep, pútkil elimiz boylap ótkerilip atırǵan aylıqtıń áhmiyeti hám bul baǵdarda júrgizilip atırǵan jumıslar haqqında ilaj qatnasıwshılarına túsinikler berdi.
Sońınan ǵalaba xabar quralları wákilleri ushın poliklinikada press-tur shólkemlestirilip, olar densawlıqtı saqlaw tarawında insan faktorın azaytıw maqsetinde, birlemshi medicinalıq xızmetke zamanagóy texnologiyalardı engiziw boyınsha alıp barılıp atırǵan, jumıslardıń barısı menen jaqınnan tanıstı.
– Poliklinikamız Nókis qalasındaǵı 40 mıńnan aslam xalıqqa medicinalıq xızmet kórsetedi, – deydi 8-sanlı shańaraqlıq poliklinika bas shıpakeriniń orınbasarı Zulfiya Ismayılova. – 2024-jıldıń 10-fevral kúni jańadan qurılıp paydalanıwǵa tapsırılǵan poliklinikamız barlıq kerekli ásbap-úskene hám ánjamlar menen tolıq támiyinlengen. Ásirese, turǵınlarımız ushın poliklinikamızda D-med elektron baǵdarlamasınıń iske túsiwi, tarawda qaǵazpazlıqtı azaytıw hám korrupciyanıń aldın alıwda áhmiyetli orın tutpaqta.
Ilaj dawamında jurnalistler taraw xızmetkerlerine sorawlar berip, oǵan tiyisli juwaplar aldı.

Adilbay Orazov,
Qaraqalpaqstan xabar agentligi sholıwshı