Keshe Tashkent qalasında ótkerilgen «Prezident Olimpiadası» jarısı óz juwmaǵına jetti.

Jarıstıń eń sońǵı kúni bolıp ótken sporttıń basketbol 3×3 hám dzyudo boyınsha finallıq bellesiwler respublikamızdıń jas sportshıları ushın oǵada áwmetli keldi. Atap aytqanda, qızlar arasında basketbol 3×3 boyınsha ótkerilgen bellesiwlerde respublikamız saylandı komandası Ferǵana wálayatı qızların jeńip shıǵıp, altın medal iyesine aylandı. Al, dzyudo boyınsha eń awır +90 kg salmaqta bellesiwlerge túsken úmitli sportshımız Ersultan Tolıbaev finalǵa shekem jetip kelip, gúmis medal menen sıylıqlandı.
Sonday-aq, keshe Olimpiada qalashasında «Prezident Olimpiadası» jarısınıń jabılıw máresimi ótkerilip, onda Qaraqalpaqstan Respublikası sport delegaciyası «Jeńiske bolǵan joqarı jigeri hám komandalıq tileklesligi ushın» nominaciyası menen sıylıqlandı. Sıylıqtı Qaraqalpaqstan Respublikası Sport ministri Erkinbay Qutıbaev qabıllap aldı.

Adilbay Orazov,
Qaraqalpaqstan xabar agentligi sholıwshı