Ózbekstanda jasalma intellekt texnologiyaların islep shıǵıw hám qollanıwdaǵı etika qaǵıydaları hám principleri tastıyıqlanadı. Bul boyınsha uyımlıq buyrıq joybarı jámiyetshiliktiń dodalawı ushın járiyalandı.

Buyrıq joybarı menen tómendegilerdi názerde tutatuǵın Etika qaǵıydaları tastıyıqlanbaqta:
– nızamlılıq;
– shaxs, jámiyet hám mámleket hám qorshaǵan tábiyiy ortalıq máplerin qorǵawdıń ústinligi;
– túsiniklilik;
– JI sistemalarınıń bárqulla insan qadaǵalawı astında bolıwı;
– sáykeslik;
– juwapkerlik;
– ádillik hám kemsitiwge jol qoymaw;
– ashıq-aydınlıq;
– maǵlıwmatlardı qorǵaw;
– isenimlilik hám qáwipsizlik;
– xabardarlıq hám sawatlılıq.
Sonıń menen birge, Etika qaǵıydalarında jasalma intellekt texnologiyaların tártipke salıwshı wákillikli uyım hám jasalma intellekt texnologiyaları tarawınıń basqa qatnasıwshılarınıń huqıqları menen minnetlemeleri belgilenbekte.
Atap ótiliwinshe, jasalma intellekt texnologiyalarınıń texnologiyalıq quramalılıǵı hám avtonomiyası, olardıń jedel rawajlanıw faktı jáne qáwip-qáterlerdi anıqlawdıń imkaniyatı bolmaǵanlıǵı sebepli Etika qaǵıydaların islep shıǵıwda insan hám mámlekettiń tiykarǵı huqıqlarına zıyan jetkermew shárti tiykar sıpatında qollanılǵan.
Málim etiliwinshe, Etika qaǵıydaları hám principlerin islep shıǵıwda bir qatar mámleketler hám xalıqaralıq shólkemlerdiń tájiriybeleri hár tárepleme úyrenip shıǵılǵan. Sonıń ishinde, BAÁniń Jasalma intellekt ministrligi hám Indoneziyanıń Kommunikaciyalar hám sanlastırıw ministrligi tárepinen tastıyıqlanǵan, sonıń menen birge, YuNESKO, Evropa Awqamı, Ekonomikalıq birge islesiw hám rawajlanıw shólkemi sıyaqlı xalıqaralıq húkimetleraralıq shólkemler tárepinen de Etika qaǵıydaların tastıyıqlanǵan hújjetler úyrenilgen.
Hújjet penen jasalma intellekt qatnasıwshılarınıń (islep shıǵıwshı, engiziwshi, tártipke salıwshı hám paydalanıwshılar) juwapkershiligi JI sistemaların islep shıǵıw, engiziw, tártipke salıw hám paydalanıw insan huqıqları, erkinlikleri, onıń ómiri hám densawlıǵı, mámleketlik hám jámiyetlik qáwipsizlik jáne qorshaǵan ortalıqqa zıyan jetkeriliwine alıp keliwi ámeldegi nızamshılıq hújjetlerine muwapıq juwapkershilikke tartıw ushın tiykar bolıwı belgilenbekte, -dep málimleme beredi xabar.uz saytı.

Qaraqalpaqstan xabar agentligi