Elimizde sońǵı jıllarda ámelge asırılıp atırǵan keń kólemli qurılıs, abadanlastırıw jumısları, reformalar óziniń unamlı nátiyjelerin kórsetpekte. Onda baslamalı byudjet arqalı xalıqtıń qálewi boyınsha eń áhmiyetli, dep esaplanǵan obektlerge ayrıqsha toqtap ótsek boladı.

Qońırat rayonı Qıyat APJdaǵı 18-sanlı ulıwma orta bilim beriw mektebiniń janında Baslamalı byudjet baǵdarlamasınıń 2025-jılǵı 1-máwsiminde zamanagóy universal sport maydanshasın qurıw boyınsha usınıs alǵa qoyılǵan edi. Máhálle turǵınları bul baslamanı belsene qollap-quwatlap, 1961 dawıs penen máwsim jeńimpazlarınan biri dep tabıldı.
Bul usınıs ámeliy nátiyjege aylanıp, barlıq qolaylıqlarǵa iye bolǵan sport maydanshası paydalanıwǵa tapsırıldı. Endi bul aymaq jasları ushın futbol, voleybol, basketbol sıyaqlı hár qıylı sport túrleri menen shuǵıllanıwı, bos waqtın mazmunlı ótkeriwi hám salamat turmıs tárizin jolǵa qoyıwı ushın qolaylı sharayatlar jaratıldı.
Máhállede ámelge asırılǵan bul joybar jaslardıń bántligin támiyinlew, olardı sportqa keńnen tartıw hám salamat áwladtı tárbiyalawǵa xızmet etedi.
Álbette, xalıqtıń isenimi hám belsendi puqaralıq poziciyası bul nátiyjege erisiwde áhmiyetli orın iyeledi.

Qaraqalpaqstan xabar agentligi