Búgingi kúnde ekologiya hám qorshaǵan ortalıqtı qorǵaw eń tiykarǵı áhmiyetli baǵdarlardan birine aylandı. Bul baǵdarda bir qatar turmıslıq ilajlar ámelge asırılmaqta.

Sonıń ishinde, Prezidentimizdiń 2025-jıl 24-noyabrde qabıl etilgen “Tashkent qalasında ekologiyalıq jaǵdaydı jaqsılaw boyınsha keshiktirip bolmaytuǵın ilajlar haqqında”ǵı pármanı menen házirgi kúnlerde baqlanıp atırǵan atmosfera hawasınıń jamanlasıwın keskin azaytıwǵa qaratılǵan jumıslar izbe-izlik penen alıp barılmaqta.
Bul baǵdarda Ózbekstan Ekologiyalıq partiyası da tábiyattı saqlaw hám onı keleshek áwlad ushın taza halda jetkeriw ushın qatań ilajlardı kóriw zárúrligin qollap-quwatlaǵan halda bir qatar baslamalardı alǵa qoymaqta.
Sonıń ishinde, 2030-jılǵa shekem basqıshpa-basqısh paytaxt hám iri qalalarda ishki janıw dvigatelleri bolǵan jeńil avtomobillerdiń háreketleniwin sheklew, normadan artıq pataslandırıwshı elementler shıǵarılǵanı ushın kompensaciya tólemlerin 10 esege shekem arttırıw, júk tasıwdı iri júk mashinalarınan temir jollarǵa hám qorshaǵan ortalıqqa az tásir kórsetetuǵın basqa transport túrlerine ózgertiwdi usınıs etpekte.
Bunnan tısqarı, qurılıs ushın tereklerdi kóshirip ótkeriw bánesinde olardı nabıt etiw jaǵdaylarına shek qoyıw maqsetinde on jıldan asqan tereklerdi kóshirip ótkeriwdi nızamlı qadaǵan etiw shárt ekenligin alǵa qoymaqta.
Óz gezeginde, Ekologiyalıq partiya qorshaǵan ortalıqtı qorǵaw jolında bir qatar ilajlardı belgilep alǵan. Atap aytqanda, partiya janında partiya belsendileri, ekolog ilimpazlar hám mámleketlik shólkemlerdiń wákillerinen ibarat Arnawlı shtab dúzilip, ekologiyalıq reydler ótkerilmekte.
Qorshaǵan ortalıqtı qorǵaw tarawındaǵı mashqalalardıń aldın alıw hám sheshiwge qaratılǵan sırt el tájiriybesine tiykarlanǵan ilimiy kózqaraslardı islep shıǵıw maqsetinde partiyanıń “Ilimpazlar korpusı” tartıldı.
Sonday-aq, xalıq, isbilermenler, ulıwma, jámiyettegi barlıq qatlamnıń ekologiyalıq bilim hám mádeniyatın bunnan bılay da arttırıw maqsetinde kompleksli úgit-násiyatlaw baǵdarlaması islep shıǵılıp, ámelge asırılmaqta.
Qalaberdi, partiya qorshaǵan ortalıqtı qorǵawdı jetilistiriw, tarawda nızamshılıqtı buzǵanı ushın juwapkershilikti kúsheytiw hám finanslıq sankciyalardı engiziwdi názerde tutatuǵın nızam joybarların islep shıǵıw boyınsha jumıslar baslanǵanın málim etti. Sonıń ishinde, “Qorshaǵan ortalıqtı monitoring etiw haqqında”ǵı jańa nızam joybarı ústinde jumıs baslap jiberilgen.
Ulıwma, Ekopartiya xalıqtıń salamatlıǵı, puqaralardıń qolaylı qorshaǵan ortalıqqa bolǵan huqıqların támiyinlewge qaratılǵan ekologiyalıq reformalarda belsene qatnasıp, tábiyattı qorǵawda bas-qas bolıwǵa bel baylaǵan.

ÓzA