3-dekabr – Xalıqaralıq mayıplar kúni

Basqa aymaqlarda bolǵanı sıyaqlı Nókis qalasında da 3-dekabr – Xalıqaralıq mayıplar kúni múnásibeti menen hár qıylı ilajlar bolıp ótpekte. Usınday bayram ilajlarınıń biri Nókistegi “Meridian” restoranında ótkerildi.
Onda Ózbekstan Mayıplar jámiyeti Qaraqalpaqstan aymaqlıq bólimi baslıǵı P.Dáwletiyarova hám basqalar sońǵı jılları elimizde imkaniyatı sheklengen puqaralarǵa kórsetilip atırǵan ǵamxorlıqlar olardıń ómirden razı bolıp jasawı ushın xızmet etip atırǵanı atap ótti. Usı maqsette turaq jaylar, hár qıylı reabilitaciyalaw texnika quralları menen támiyinlenip atırǵanı, biypul medicinalıq tekseriwden ótkerilip, ruwxıy-materiallıq qollap-quwatlanıp atırǵanı haqqında sóz boldı.
Nókis qalası hákimligi xam Ózbekstan Mayıplar jámiyeti Nókis qalalıq bólimi tárepinen shólkemlestirilgen ilajǵa imkaniyatı sheklengen 120 puqara qatnasıp, olarǵa sawǵalar tapsırıldı. Bayram dasturxanı jazılıp, qızıqlı koncert baǵdarlaması qoyıp berildi.
– Imkaniyatı sheklengen puqaralar hámiyshe bizdiń itibarımızda, – deydi Nókis qalalıq mayıplar jámiyeti baslıǵı Gúlnara Tasbaeva. – Bayram qarsańında olardıń jaǵdayınan xabar alınıp, sawǵalar ulasılmaqta. Búgin bayram ilajın shólkemlestiriwde jaqınnan járdem bergen Nókis hákimligine minnetdarshılıǵımızdı bildiremiz.

Qaraqalpaqstan xabar agentligi