8-dekabr – Ózbekstan Respublikası Konstituciyası qabıl etilgen kún múnásibeti menen Qaraqalpaqstan medicina institutında saltanatlı bayram keshesi bolıp ótti.

Ilajǵa Qaraqalpaqstan Respublikası Joqarǵı Keńesiniń komitet baslıǵı A.Jumanazarov, Qaraqalpaqstan Respublikası Ishki isler ministri B.Tórebekov, Joqarǵı sud sudyası A.Saparov, institut dekanları, orınbasarları, professor-oqıtıwshılar, tyutorlar hám student-jaslar qatnastı.
Saltanatlı keshe mámleketlik gimnler menen baslanıp, onı institut rektorı O.Xalimov kiris sóz benen ashıp berdi.
Ilajda atap ótilgenindey, mámleketimizdiń tiykarǵı nızamı – Konstituciya insan huqıqları menen erkinliklerin qorǵaytuǵın, demokratiyalıq mámleket hám puqaralıq jámiyetin qáliplestiriwdiń bekkem huqıqıy tiykarı bolıp esaplanadı.
1992-jıl 8-dekabr kúni qabıl etilgen Ózbekstan Respublikası Konstituciyası xalqımızdıń mentaliteti hám úrp-ádetleri, zamanagóy demokratiyalıq principler, aldınǵı xalıqaralıq tájiriybeler tiykarında islep shıǵılǵan bolıp, ótken jıllar dawamında mámleket rawajlanıwınıń bas ólshemine aylanǵan.
Keshede shıǵıp sóylegenler sońǵı jılları mámleketlik basqarıwda nızam ústinligin támiyinlew, jańasha mámleketlik siyasattı qáliplestiriw, xalıqtıń huqıqıy mádeniyatın arttırıw boyınsha ámelge asırılıp atırǵan keń kólemli reformalarǵa joqarı baha berdi. Ásirese, 2023-jıl 30-aprel kúni ótkerilgen ulıwmaxalıqlıq referendum nátiyjesinde Konstituciyanıń jańa redakciyada qabıl etiliwi barlıq tarawlarda, sonıń ishinde, bilimlendiriw sistemasında túpkilikli ózgerisler hám jańalanıwlar ushın huqıqıy tiykar jaratqanı kórsetip ótildi.
Haqıyqatında da mámleketimizdiń jańalanǵan Konstituciyasında jaslardıń bilim alıwı, kásip-óner iyelewi, intellektuallıq hám ruwxıy jaqtan kamil insanlar bolıp jetisiwi ushın zárúr principler belgilengen. Usı maqsette, Qaraqalpaqstanda joqarı oqıw orınları sanınıń artıwı, institutlardıń materiallıq-texnikalıq bazasınıń bekkemleniwi, qabıllaw kvotalarınıń kóbeytiliwi, ásirese, qosımsha grant orınlarınıń ajıratılıwı – Bas Nızamımızda belgilengen normalardıń turmıstaǵı ayqın kórinisleri bolıp esaplanadı.
Medicina institutında ótkerilgen ilaj tek ǵana Konstituciya qabıl etilgeniniń 33 jıllıǵın múnásip belgilewge emes, al studentlerde Watanǵa sadıqlıq, nızamlarǵa húrmet hám huqıqıy mádeniyattı bekkemlewge xızmet etti dep ayta alamız.

Adilbay Orazov,
Qaraqalpaqstan xabar agentligi sholıwshı