Moynaq rayonında 3-dekabr – Xalıqaralıq mayıplardı qorǵaw kúni múnásibeti menen bayram ilajı bolıp ótti.
Ilajda rayon hákiminiń orınbasarı M.Jumabaev hám basqalar shıǵıp sóylep, mayıplıǵı bolǵan puqaralarǵa kórsetilip atırǵan itibar, jaratılıp atırǵan sharayatlar hám olardıń jámiyettegi ornına ayrıqsha toqtap ótti.
Atap ótilgenindey, 3-dekabr – jámiyetimizde barlıq qatlamlardıń teńligi, adamgershilik hám miyrim-shápáát qádiriyatlarınıń ayqın úlgisi bolıp esaplanadı. Mayıplıǵı bolǵan puqaralardıń jámiyetlik jumıslarda belsene qatnasıwı hám olardıń sociallıq turmısqa tolıq túrde qosılıwı ulıwma rawajlanıwımızdıń áhmiyetli faktorlarınan biri bolıp esaplanadı.
Búgingi kúni rayonda usı kategoriyadaǵı puqaralardıń sociallıq qorǵalıwın kúsheytiw, olardı qollap-quwatlaw, medicinalıq-sociallıq xızmetler menen támiyinlew hám olardıń belsendi turmısqa integraciyasın támiyinlew baǵdarında bir qatar jumıslar ámelge asırılmaqta.
Ilaj dawamında mayıplıǵı bolǵan puqaralarǵa húrmet-izzet kórsetilip, olarǵa sawǵalar tapsırıldı.
Kórkem óner sheberleriniń shıǵıwları, dóretiwshilik kórgizbeler hám túrli mádeniy baǵdarlamalar ilajǵa ózgeshe zawıq baǵıshladı.

Qaraqalpaqstan xabar agentligi