Tómengi palatanıń májilisinde atap ótilgenindey, 2026-jılı respublika byudjetiniń qárejetleri 308,4 trillion sum bolıwı kútilmekte. Qárejetlerdiń derlik 55 procenti sociallıq tarawǵa ajıratıladı.

Mámleketimiz basshısı tárepinen reformalardıń eń tiykarǵı baǵdarı sıpatında belgilep berilgen bilimlendiriwdiń sapasın arttırıw, xalıqtıń talaplarına hám xalıqaralıq standartlarǵa tolıq juwap beretuǵın medicina hám sociallıq qorǵaw sistemasın shólkemlestiriw ushın Mámleketlik byudjet qárejetleriniń 25,5 procenti muǵdarındaǵı qarjılar bilimlendiriw hám ilim tarawı, 12,1 procenti densawlıqtı saqlaw hám 4,2 procenti xalıqtı sociallıq qorǵawdıń jámi qárejetleri ushın ajıratılatuǵını óz kórinisin tapqan. Tek ǵana onkologiya tarawı ushın 250 milliard sum yamasa usı jılǵa salıstırǵanda 1,5 esege kóp qarjı ajıratılıwı rejelestirilmekte.
Sonday-aq, kelesi jıldan baslap mámleketlik yamasa jeke menshik shólkemlerdegi barlıq isleytuǵın hayal-qızlarǵa hámiledarlıq hám tuwıw napaqasın tólew jolǵa qoyıladı. Bul maqsetlerge Sociallıq qamsızlandırıw qorı esabınan 3,4 trillion sum tólenedi. Onıń ushın byudjetten usı qorǵa 1,5 trillion sum ótkeriledi.
Napaqa, materiallıq járdem hám basqa da sociallıq járdemler ushın 17 trillion sum qarjı ajıratıladı. Turaq jay sharayatın jaqsılaw maqsetleri ushın 15 trillion sum qaratıladı. Sonnan 12,3 trillion sumı kommerciyalıq banklerge ipoteka ushın resurs sıpatında ajıratıladı. Qalǵan bólegi subsidiyalar ushın qaratıladı.

Muhtarama Komilova,
Nosir Haydarov (súwret),
ÓzA