Ózbekstan Respublikası Prezidentiniń 2024-jıl 25-iyun sánesindegi “Máhállelerdi abadanlastırıw, kóklemzarlastırıw hám kelbetin túp-tiykarınan jaqsılawǵa baylanıslı qosımsha ilajlar haqqında”ǵı PQ-234-sanlı qararı tiykarında Máhálle servis kompaniyalarınıń jumısın jolǵa qoyıw belgilengen.

Usı qarar talaplarınıń Bozataw rayonında orınlanıwın támiyinlew maqsetinde, bıyılǵı jılı Qusxanataw awıl puqaralar jıyını aymaǵınan “Máhálle servis kompaniyası” imaratın jańadan qurıw reje etip alınıp, imarattıń qurılıs jumısları baslanǵan edi. Qolı gúl qurılısshılardıń alıp barǵan jumıslarınıń nátiyjesinde, jaqında bul jerde qurılıs jumısları tolıq juwmaqlanıp, ol xalıq iygiligi ushın paydalanıwǵa tapsırıldı.
Jańa imarattıń ashılıw saltanatına rayon basshıları, deputatlar, aymaq belsendileri hám keń jámiyetshilik wákilleri qatnastı.
Ilajda rayon hákimi B.Ubbiniyazov, Ózbekstan Máhálleleri awqamı Qaraqalpaqstan Respublikası basqarmasınıń baslıǵı S.Turmanovlar shıǵıp sóylep, aymaq xalqın hám ilaj qatnasıwshıların jańa imarattıń ashılıwı menen qızǵın qutlıqladı.
Bunnan soń imarat aldına tartılǵan lentalar kesilip, ilaj qatnasıwshıları servis kompaniyasınıń ishki múmkinshilikleri hám onda jaratılǵan qolaylıqları menen jaqınnan tanıstı.

Adilbay Orazov,
Qaraqalpaqstan xabar agentligi sholıwshı