1-dekabr – Jer júzilik AIJSke qarsı gúresiw kúni múnásibeti menen salamat turmıs tárizin qáliplestiriw, oǵan qarsı gúresiw hám profilaktikalıq úgit-násiyatlaw jumısların alıp barıw maqsetinde bir qatar ilajlar ótkerildi.

Qanlıkól rayonlıq Qorǵanıw isleri bóliminde de Medicina birlespesi shıpakerleri tárepinen AIJSke qarsı gúresiw hám onıń aldın alıw boyınsha úgit-násiyatlaw ilajı ótkerildi.
Onda atap ótilgenindey, AIJS – bul adam immuniteti jetispewshiligi virusı bolıp, virus adamnıń qorǵanıw quralı bolǵan immunitet sistemasın tereń jaraqatlaydı. Bul kesellik deregi AIV infekciyasına kesellengen nawqas hám kórinisinen salamat virus tasıwshı adamlar esaplanadı. AIV jınısıy, qan arqalı (parenteral jol), anadan balaǵa (vertikal) usılda juǵadı. AIV tı juqtırǵan adamda sırtqı sırtınan keselligi sezilmeydi, insan ózin salamat sezedi, kesellik belgileri kórinbeydi. Keselliktiń jasırın dáwiri 2 jıldan 12 jılǵa shekem hám onnan da kóbirek dawam etiwi múmkin.
Ilajda qánigeler keselliktiń aldın alıw boyınsha usınısların bildirip, qatnasıwshılar ózlerin qızıqtırǵan sorawlarǵa juwap aldı.

Qaraqalpaqstan xabar agentligi