Tashkent qalasında futbol boyınsha 16 jasqa shekemgi jas óspirimler arasında Ózbekstan Futbol Assosaciyasınıń birinshiligi bolıp ótti.

Jarısqa elimizdiń barlıq aymaqlarınan eń kúshli komandalar qatnasıp, jeńimpazlıq ushın óz-ara bellesti. Ásirese, bunda respublikamızdıń jas futbolshıları ózleriniń sheberliklerin kórsetip, úshinshi orındı jeńip alıwǵa miyasar boldı.
Atap aytqanda, dáslepki turda Tashkent wálayatı futbol akademiyası tárbiyalanıwshılarına jeńilip qalǵan komandamız, ekinshi hám úshinshi turda Ferǵananıń «Neftchi» hám Jizzaq futbol akademiyası jasların jeńip shıǵıwǵa eristi.
Sherek finalda Namangan wálayatı jasların 1:0 esabında jeńgen futbolshılarımız yarım finalda Adil Ahmedovtıń «Adil Junior» klubına 1:3 esabında jeńilip qaldı.
Qola medalı ushın «Bunyodkor» klubı menen ótken ushırasıwda komandamız aǵzaları ózleriniń sheberliklerin kórsetip, óz qarsılasların 1:0 esabında jeńip shıǵıwǵa miyasar boldı.
Eń quwanıshlı tárepi sonda, turnirde komandamızdıń jeńisine óziniń salmaqlı úlesin qosqan komanda dárwazamanı Xojabek Mátmuratov birinshiliktiń «Eń jaqsı dárwazamanı» nominaciyası menen sıylıqlandı.
Birinshilik sońında jeńimpazlar shólkemlestiriwshiler tárepinen arnawlı diplom, medal hám estelik sawǵalar menen sıylıqlandı.
Respublikamızdıń futbol komandasın bul jarısqa trenerlerden Berdibek Sherimbetov, Aydos Mırzamuratov hám Timur Turdievler tayarladı.

Adilbay Orazov,
Qaraqalpaqstan xabar agentligi sholıwshı