Ájiniyaz atındaǵı Nókis mámleketlik pedagogikalıq institutında 1-dekabr – Qaraqalpaq tili bayramı kúni hám qaraqalpaq tiline mámleketlik til biyligi berilgenine 36 jıl tolıwına arnalǵan bayram keshesi bolıp ótti.

Ilajda Ózbekstan Ilimler akademiyası Qaraqalpaqstan bólimi Qaraqalpaq gumanitar ilimler ilimiy-izertlew institutı professorı P.Najimov, professorlar Q.Qoshanov, G.Qurbaniyazov hám basqalar qaraqalpaq tiline mámleketlik til biyligi beriliwiniń tariyxı, túrkiy tiller sistemasında qaraqalpaq tiliniń mámleketlik til sıpatındaǵı ornı, búgingi kúnde ushırasıp atırǵan mashqalalar, aldaǵı wazıypalar, internet tarmaǵında qaraqalpaq tilin rawajlandırıw máseleleri boyınsha bayanat jasadı.
Atap ótilgenindey, búgingi kúnde dúnyada altı mıńnan aslam tiller bolǵanı menen, olardıń tek 170 ten aslamı óziniń mámleketlik til statusına iye. Olar arasında qaraqalpaq tiliniń de bar ekenligi úlken quwanısh hám maqtanısh. Qaraqalpaq tiliniń milliy ózgesheliklerin saqlap qalǵan halda rawajlandırıw, ilimiy-izertlew jumısların jańa basqıshqa kóteriw, dúnya tilleri qatarında abıray-mártebesin arttırıw, keleshek áwladlarǵa sap halında jetkeriw boyınsha bir qatar ilajlar ámelge asırılmaqta. Atap aytqanda, Qaraqalpaqstan Respublikası Joqarǵı Keńesi hám Ministrler Keńesiniń qollap-quwatlawı menen «Qaraqalpaq tiliniń túsindirme sóziliginiń VII tomlıǵı» baspadan shıǵarıldı.
Ilaj sheńberinde institutta bayram múnásibeti menen bir qatar mádeniy-aǵartıwshılıq ilajların shólkemlestiriwge belsene qatnasqan professor-oqıtıwshılar hám student-jaslarǵa húrmet jarlıǵı menen bayram sawǵaları tapsırıldı.
Bayram keshesi instituttıń «Tumaris» xalıq ansambli aǵzaları, filologiya fakultetiniń qábiletli studentleri atqarıwındaǵı koncert baǵdarlaması menen dawam etti.

Qaraqalpaqstan xabar agentligi.