Ózbekstandaǵı Islam civilizaciyası orayı Evropanıń abıraylı sıylıqlarınan biri – “Prix Avicenne 2025” (Avicenna sıylıǵı) na miyasar boldı, dep xabar bermekte usı oraydıń málimleme xızmeti.

Saltanatlı máresim Parijdegi Franciya Milliy medicina akademiyası imaratında bolıp ótti. Onda jetekshi ilimpazlar, medicina tariyxshıları, shıǵıstanıwshılar, islam miyrası boyınsha qánigeler hám Evropa mádeniy mákemeleriniń wákilleri qatnastı. Rásmiy májilis dawamında Ózbekstandaǵı Islam civilizaciyası orayına ullı Avicenna estelik statuetkası hám sıylıq diplomı tapsırılatuǵını járiyalandı.
Francuz ilimiy toparı ayrıqsha atap ótkenindey, Ózbekstan Prezidenti Shavkat Mirziyoevtiń baslaması menen shólkemlestirilgen oraydıń jumısı – adamzat tariyxındaǵı ullı ilimpazlardan biri Ibn Sinanıń miyrasın úyreniwde zamanagóy qatnastıń úlgili mısalı boldı. Akademiya wákilleri Ózbekstan búgin tek ǵana óziniń mádeniy-ilimiy ótmishine emes, al dúnya gumanitar ilimlerine de ǵamxorlıq etip, salmaqlı úles qosıp, jańa keń kólemli joybarlardı, izertlew standartların, restavraciyalaw, kataloglastırıw hám islam intellektuallıq miyrasın úgit-násiyatlawdı alǵa qoyıp atırǵanın atap ótti.
Francuz ilimpazlarınıń pikirinshe, orayda jaratılǵan ekspoziciya Avicenna miyrasın úyreniw hám izertlewdi jańa basqıshqa alıp shıǵıp, Ózbekstandı bul tarawda jetekshi maydanǵa aylandırmaqta.
– Bul sıylıq húrmetli Prezidentimiz Shavkat Mirziyoevtiń keń kólemli jumısına xalıqaralıq tán alınıwdıń jáne bir ayqın tastıyıǵı bolıp xızmet etedi,-dedi Islam civilizaciyası orayınıń direktorı, Ózbekstan mádeniy miyrasın saqlaw, úyreniw hám úgit-násiyatlaw boyınsha Jáhán jámiyetiniń baslıǵı Firdavs Abduxoliqov óziniń shıǵıp sóylegen sózinde. – “Prix Avicenne” – bul oraydıń ilimiy hám bilimlendiriw mazmunın qáliplestirip atırǵan júzlegen milliy hám sırt elli ilimpazlar, izertlewshiler, awdarmashılar hám ekspertlerdiń miynetine joqarı húrmet hám múnásip baha. Biz bunnan bılay da xalıqaralıq izertlewlerdi keńeytiwdi, ilimiy baylanıslardı bekkemlewdi hám Avicenna jáne elimizdiń barlıq ullı oyshıllarınıń miyrasına baǵıshlanǵan jumıslardı dawam ettiremiz.
Maǵlıwmat ornında: Franciyanıń jetekshi ilimiy shólkemleri tárepinen shólkemlestirilgen “Prix Avicenne” sıylıǵı gumanitar hám tábiyǵıy pánlerde erisilgen áhmiyetli jetiskenlikler jáne tariyxıy hám ilimiy miyrastı saqlaw hám úgit-násiyatlawǵa qosılǵan úles ushın beriledi.

ÓzA