Oliy Majlis Nızamshılıq palatasındaǵı “Adolat” SDP frakciyasınıń májilisinde dáslep “Sudyalar jámiyetshiligi uyımları jumısınıń nátiyjeliligin hám ashıq-aydınlıǵın arttırıw jáne sud erkinligi kepilliklerin bunnan bılay da kúsheytiw ilajları haqqında”ǵı Prezident pármanınıń mazmun-mánisi dodalandı.

Atap ótilgenindey, partiya baǵdarlamasında sudlardı insan huqıqlarınıń haqıyqıy qorǵawshısına aylandırıw tiykarǵı wazıypa sıpatında orın alǵan. Bul hújjet partiyanıń ideya hám maqsetlerine únles bolıp, ol sud-huqıq tarawındaǵı reformalardıń logikalıq dawamı ekeni atap ótildi.
Bunnan soń deputatlar “2026-jıl ushın Ózbekstan Respublikasınıń Mámleketlik byudjet haqqında”ǵı nızam joybarın kórip shıqtı. Bul másele boyınsha ekonomika hám qarjı ministriniń orınbasarı Gulnora Rahimova tolıq maǵlıwmat berdi.
Atap ótilgenindey, dúnya ekonomikasındaǵı keskin ózgerislerge qaramastan, Ózbekstan ekonomikası turaqlı ósiwdi dawam ettirmekte. 2024-jılı mámleket ekonomikası 6,5 procentke ósip, 115 milliard AQSh dollarına jetken bolsa, usı jılı bul kórsetkishler 7 procentke hám derlik 136 milliard AQSh dollarına jetiwi kútilmekte. Bul kórsetkishti 2026-jılı 6,6 procentke, 2027-2028-jıllarda bolsa sáykes túrde 6,8-6,9 procentke jetkeriw maqset etilgen.
Kelesi jılı tiykarǵı salıqlardıń muǵdarı ózgerissiz qalatuǵını atap ótildi. Sonıń ishinde, QQS 12 procent, fizikalıq táreplerden alınatuǵın dáramat salıǵı 12 procent muǵdarında qalmaqta.
Dodalawlarda deputatlar sociallıq tarawǵa baǵdarlanıp atırǵan qarjılar hám basqa da xalıqtıń turmıs abadanlıǵın arttırıwǵa qaratılǵan maqset hám wazıypalarǵa itibar qarattı. Mámleketlik byudjet qárejetleriniń 25,5 procenti muǵdarındaǵı qarjılar bilimlendiriw hám ilim tarawı, 12,1 procenti densawlıqtı saqlaw hám 4,2 procenti xalıqtı sociallıq qorǵaw qárejetleri ushın ajıratılatuǵını óz kórinisin tappaqta.
Dodalawlar dawamında frakciya aǵzaları kelesi jılı “Spinal bulshıq et atrofiyası” diagnozı qoyılǵan nawqas balalarǵa medicinalıq-sociallıq járdem kórsetiw hám dári-dármaqlardı biypul jetkerip beriw, adamnıń immunitet jetispewshiligi virusı keltirip shıǵaratuǵın keselliktiń tarqalıwına qarsı gúresiw boyınsha qosımsha ilajlardı qarjılandırıw máselesine ayrıqsha itibar qarattı.

Muhtarama Komilova, ÓzA