Xalıq demokratiyalıq partiyası frakciyasınıń májilisinde 2026-jıl ushın Mámleketlik byudjet joybarı dodalanıp, deputatlar tiykarǵı itibardı qarjılardıń sociallıq baǵdarlanǵanlıq jaǵdayına qarattı.

Atap ótilgenindey, kelesi jılı sociallıq tarawlarǵa 220 trillion sum ajıratıw rejelestirilgen bolıp, bul jámi qárejetlerdiń 54,7 procentin quraydı. Bul qarjınıń 100,3 trillion sumın bilimlendiriwge ajıratıw názerde tutılǵan hám bul usı jıldaǵıǵa salıstırǵanda 8,1 trillion sumǵa kóp. Onda baqshalardıń qárejeti 20 procentti, professional hám joqarı bilimlendiriw qárejetleri bolsa 16,7 procentti quraydı.
– Mámleketlik byudjet joybarın kórip shıǵıwda tek ǵana qarjılar ajıratıw emes, al bul qarjılardı qalay jumsaw mexanizmlerin de dodaladıq, – deydi XDP frakciyasınıń aǵzası Firdavs Sharipov. – Byudjet qárejetlerinde sociallıq taraw ushın ajıratılǵan qárejetlerge ayrıqsha itibar qarattıq. Quwanıshlı tárepi, bilimlendiriw, medicina, xalıqtı sociallıq qollap-quwatlaw baǵdarlarına baǵdarlanıp atırǵan byudjet qarjılarınıń kólemi jıldan-jılǵa kóbeyip barmaqta. Bul bolsa partiyamız elektoratı wákilleriniń mápleri ushın xızmet etedi.
Sonday-aq, májiliste 2026-jıldan baslap akademiyalıq licey hám texnikumlardı saqlaw, ulıwma bilim beriw mekteplerin qurıw, ońlaw jumısların qarjılandırıw respublikalıq byudjetten jergilikli byudjetlerge ótkerilip atırǵanı atap ótildi. Jergilikli byudjetlerde qaldırılıp atırǵan túsimler usı qárejetlerge qaratılıwı rejelestirilgen.

Muhtarama Komilova, ÓzA