Ájiniyaz atındaǵı Nókis mámleketlik pedagogikalıq institutında Hayal-qızlarǵa bolǵan zorlıqtı saplastırıw xalıqaralıq kúni múnásibeti menen ótkerilip atırǵan 16 kúnlik globallıq akciya sheńberinde ushırasıw bolıp ótti.

“Hayal-qızlarǵa qarsı sanlı zorlıqqa shek qoyıw ushın birleseyik” atamasında shólkemlestirilgen ilajda Mektepke shekemgi hám baslawısh bilimlendiriw fakultetiniń tyutorları hám student-qızlar qatnastı.
Ushırasıwda Qaraqalpaqstan Respublikası Ishki isler ministrligi Jámiyetlik qáwipsizlik xızmeti huqıqbuzarlıqlar profilaktikası basqarması baslıǵınıń orınbasarı, podpolkovnik Xurzada Reyimqulova, Qaraqalpaqstan Respublikası Hayal-qızlardı reabilitaciyalaw hám beyimlestiriw orayınıń baslıǵı Sayyora Nasirova, institut rektorınıń hayal-qızlar máseleleri boyınsha másláhátshisi Sayyora Bekchanova hám basqalar hayal-qızlar arasında ushırasatuǵın zorlıq túrleri, onıń sociallıq aqıbetleri, sonday-aq, bunday jaǵdaylardıń aldın alıw boyınsha ámelge asırılıp atırǵan mámleketlik siyasat hám kompleksli ilajlar haqqında tolıq maǵlıwmat berdi.
Qánigeler tárepinen huqıqıy mádeniyattı arttırıw, shańaraqlıq qatnasıqlarda salamat ortalıqtı qáliplestiriw, tartıslı jaǵdaylardı tınısh jol menen sheshiw boyınsha usınıslar bildirildi.
Sonday-aq, qatnasıwshılarǵa “Qorǵaw orderi,” “Isenim telefonı,” “Hayal-qızlar dápteri,” “Temir dápter” sıyaqlı sistemalar arqalı kórsetilip atırǵan ámeliy járdemler, mashqalalı jaǵdaylarda múrájat etiw tártibi de túsindirildi.
Ilaj dawamında student-jaslar menen ashıqtan-ashıq sóylesiw ótkerilip, olardıń sorawlarına qánigeler tárepinen tolıq juwaplar berildi.
Qatnasıwshılardıń itibarına hayal-qızlardı kúsh kórsetiw hám zorlıqtan qorǵawǵa qaratılǵan videorolikler kórsetildi.

ÓzA