Búgin Qaraózek rayonındaǵı “Ámirbay ata” fermer xojalıǵında atız shetlerinen nátiyjeli paydalanıw hám kelesi jıl zúrááti ushın gúzgi biyday tárbiyasına baǵıshlanǵan ámeliy seminar shólkemlestirildi.

Oǵan rayon hákimi, taraw wákilleri hám fermerler qatnastı.
Seminarda Prezidentimizdiń 2024-jıl 30-dekabrdegi «Awıl xojalıǵı maydanlarındaǵı qosımsha imkaniyatlardan paydalanǵan halda ónim jetistiriwdi kóbeytiwge baylanıslı ilajlar haqqında»ǵı qararınıń orınlanıwı sheńberinde awıl xojalıǵında alıp barılıp atırǵan jumıslar dodalanıp, atız shetlerinen nátiyjeli paydalanıw, eginlerdi óz waqtında azıqlandırıw hám suwǵarıw boyınsha usınıslar berildi. Sonday-aq, zıyankeslerge qarsı gúresiw, japıraqtan azıqlandırıw hám agrotexnikalıq ilajlar kelesi jıl ónimdarlıǵı ushın áhmiyetli faktor ekenligi atap ótildi.
Seminar juwmaǵında qatnasıwshılar “Aytbay jeri” JShJ aymaǵına barıp, baǵ qatarları arasında ámelge asırılıp atırǵan jumıslar menen tanıstı.
Nókis rayonındaǵı “Diyqan arna” mákan puqaralar jıyınında da usı máselelerge baǵıshlanǵan ámeliy-seminar bolıp ótti. Ilajda rayon hákimi, taraw basshıları hám fermer xojalıqları qatnastı.
Seminarda atızǵa jergilikli tógin shıǵarıw, azıqlandırıw hám suwǵarıw jumısların nátiyjeli jolǵa qoyıw, bos jerlerge toqsanbastı eginlerdi jaylastırıw, gúzgi biyday tárbiyası, zıyankeslerge qarsı gúresiw, japıraqtan azıqlandırıw hám agrotexnikalıq ilajlardı durıs orınlaw boyınsha ámeliy kórsetpeler berildi. Qánigeler bıyıl qıs máwsiminiń jıllı baslanıwı biyday ushın sezilerli tásir etetuǵının ayrıqsha atap ótti.
Seminar dawamında baǵlarda qatar araları bos maydanlarınan paydalanıw, toqsanbastı eginlerdiń túrleri hám olardı tárbiyalaw talapları ámeliy mısallar tiykarında túsindirildi.

Qaraqalpaqstan xabar agentligi