Hár aydıń sońǵı háptesi parlament deputatları ushın ayrıqsha áhmiyetke iye. Sebebi, usı kúnleri deputatlar orınlarǵa shıǵıp, saylawshılar menen ashıq sóylesiwler ótkeredi. Bul ushırasıwlarda puqaralar ózlerin qıynap atırǵan máselelerdi ashıq aytadı, usınıs hám pikirlerin bildiredi.

Eń áhmiyetlisi, múrájatlar tıńlanadı, mashqalalar sheshimsiz qalmaydı. Nızamshılıq palatasınıń deputatı Guljan Xalmuratovanıń saylawshılar menen ushırasıwı Shomanay rayonınan baslandı.
Dáslepki mánzil rayondaǵı “Birleshik” APJ boldı. “Birleshik” APJ Shomanay rayonı orayınan 28 kilometr qashıqlıqta jaylasqan bolıp, bul jerde 4 mıńnan aslam adam jasaydı. Máhálle turǵınları tiykarınan diyqanshılıq hám sharwashılıq penen shuǵıllanadı. “Birleshik” APJ 11 awıldı óz ishine alıp, bul awıllar 25 kósheden ibarat. Ulıwma jer maydanı 310 gektar. Sonnan 179 gektarı qıytaq jerler bolıp esaplanadı.
Máhálle aymaǵındaǵı 205 xojalıq hám 1 mıń 125 adam qıytaq jerlerin suwǵarıwda suwdıń joqlıǵınan qıynalıp atarǵan edi. Usı qıytaq jerlerdi suwǵarıwda suw nasosın hám quyash panelin ornatıp beriwde járdem sorap múrájat etken edi. Bul mashqalanı xalıq wákili hár tárepleme úyrenip shıǵıp, grant jazıw kerekligin usınıs etti. Oliy Majlis janındaǵı puqaralıq jámiyeti institutların qollap-quwatlaw jámiyetlik fondı tárepinen “Birleshik” APJǵa 170 mln. sum qarjı ajıratılıp, “SHIMGE 500” atamasındaǵı 32 kvt.lıq 2 suw nasosı hám quyash paneli ornatıp berildi.
Endi 205 xojalıq óz qıytaq jerlerin suwǵarıwda, xalıqtıń qıytaq jerden paydalanıwında hám shańaraǵına dáramat alıp keliwine sharayat jaratıldı. Deputattıń járdemi menen mashqala óz sheshimin taptı. Xalıq wákili usı máhálledegi mámleketlik grant tiykarında islengen jumıslardı kózden ótkerip, máhálle tuǵınları menen jaqınnan pikirlesip, olardıń máhálle infrastrukturasın bunnan bılay da jaqsılaw baǵdarındaǵı pikir hám usınısların tıńladı. Kóterilgen máseleler qadaǵalawǵa alındı.
Oliy Majlis Nızamshılıq palatasınıń deputatı Guljan Xalmuratovanıń ushırasıwı Qanlıkól rayonında da dawam etti. Dáslep xalıq wákili rayondaǵı “Arzımbetqum” APJda jasap atırǵan óz qıytaq jerlerinen únemli paydalanıp kiyatırǵan shańaraq iyeleri menen sáwbetlesti. Usı máhálleniń turǵını S.Ótepbergenov hám onıń ómirlik joldası P.Úsenova pensiyaǵa shıqqanına qaramastan baǵshılıq penen shuǵıllanıp, úy aldı qıytaq jerinen únemli paydalanıp kiyatırǵan qıytaq jer iyelerinen biri. “Qıytaq jer – qosımsha dáramat deregi” ekenin bilgen xojalıq iyeleri úy aldı qıytaq jerine hár qıylı miyweli terek nálleri hám qulpınaydıń túrli sortların egip jetistirip atır. Xalıq wákili shańaraq iyesi menen sóylesip, baǵshılıqtıń ózine tán sırları, ıssıxanada jetistirilip atırǵan ónimler, qulpınay egiw hám onı jetistiriwdiń sırları menen ortaqlastı. Deputattıń keyingi mánzili “Mádeniyat” MPJ boldı. Usı máhállede jasawshı puqara Úmitgúl Seytova kelini Nilufar Uzaqbaevanı Respublika kóleminde úlken operaciya jolı menen emlewde ámeliy járdem sorap múrájat etken edi. Kelini N.Uzaqbaeva avtoavariya aqıbetinde bas súyegi awır jaraqatlanıp, mańlay súyegi ezilip ketkenligi, sonı Ándijan wálayatındaǵı oraylıq emlewxanada operaciya islewde járdem soraǵan edi. Deputat dárhal tiyisli shólkemler menen sóylesip, Oliy Majlis janındaǵı puqaralıq jámiyeti institutların qollap-quwatlaw jámiyetlik fondı tárepinen tiyisli járdemler berilip, puqara Ándijan wálayatında operaciya islendi hám operaciyası tabıslı ótti. Xalıq wákili usı puqaranıń úyine barıp, onıń jaǵdayınan xabar aldı.
Haqıyqatında da hár bir múrájattıń artında insan qádiri turǵanın ańlaw qıyın emes. Orınlarda bul baǵdardaǵı sawaplı jumıslar dawam etpekte.

Qaraqalpaqstan xabar agentligi