Tashkent qalasında sociallıq qorǵaw hám miynet bazarın rawajlandırıwǵa qaratılǵan eń áhmiyetli máseleler boyınsha regionallıq seminar bolıp ótti.

Ilaj Aziya rawajlanıw bankiniń (ARB) “Sapalı jumıs orınları hám miynet tarawınıń keleshegi” joybarı sheńberinde shólkemlestirildi.
Seminarǵa Sociallıq qorǵaw milliy agentligi, Kámbaǵallıqtı qısqartıw hám bántlik ministrliginiń juwapkerleri, sonday-aq, Oraylıq hám Shıǵıs Aziya mámleketlerinen kelgen 50 ge shamalas ekspert qatnastı.
Ilajda atap ótilgenindey, sociallıq qamsızlandırıw sistemaların modernizaciyalaw, májbúriy qamsızlandırıw mexanizmlerin kúsheytiw hám xalıqtıń háreketsheńligi artıp atırǵan sharayatta qarjılandırıwdıń jańa kózqarasların engiziw – regiondaǵı ulıwmalıq maqsetlerden biri. Sonıń menen birge, Qubla Koreya, Tailand, Malayziya sıyaqlı mámleketlerdiń aldınǵı xalıqaralıq ámeliyatı region mámleketleri ushın beyimlestiriliwi múmkin bolǵan nátiyjeli modeller sıpatında usınıldı.
– Bárinen burın, bul ilajdı shólkemlestiriwde jaqınnan birge islesken Sociallıq qorǵaw milliy agentligi hám Kámbaǵallıqtı qısqartıw hám bántlik ministrligine óz minnetdarshılıǵımdı bildiremen, – deydi Aziya rawajlanıw bankiniń wákili Omer Bin Ziya. – Sociallıq qamsızlandırıw hám jumıssızlıqtı qamsızlandırıw sistemalarına baǵıshlanǵan bul regionallıq seminardı ótkeriw biz ushın áhmiyetli baslama bolıp esaplanadı. Búgingi májilis Oraylıq hám Batıs Aziya mámleketleri, sonday-aq, usınıs etilgen Shıǵıs Aziya mámleketleriniń tájiriybelerin úyreniw, óz-ara pikir alısıw hám nátiyjeli ámeliyatlardı dodalaw ushın úlken imkaniyat jaratadı. Ózbekstan sociallıq qorǵaw sistemasın izbe-iz bekkemlew jolında áhmiyetli reformalardı ámelge asırmaqta. Házirgi waqıtta islep shıǵılıp atırǵan “Sociallıq qamsızlandırıw haqqında”ǵı nızam tez arada qabıl etiliwi kútilmekte. Bankimiz bul nızamdı ámeliyatqa engiziw procesinde Ózbekstan húkimetin tolıq qollap-quwatlawǵa tayar.

Shahnoza Mamaturopova, Rustam Nazarmatov (surat), ÓzA