Prezident Shavkat Mirziyoev 28-noyabr kúni paytaxtımızdaǵı Xalıqaralıq kongress orayında byurokratiyanı saplastırıw máselelerine baǵıshlanǵan xalıqaralıq forumnıń saltanatlı ashılıw máresiminde qatnastı.

Forumda Ózbekstan Respublikası hám Birlesken Arab Ámirlikleri húkimetleri, sırt mámleketler hám xalıqaralıq shólkemlerdiń joqarı mártebeli wákilleri, mámleketlik xızmet tarawındaǵı jetekshi ekspertler hám jámiyetlik belsendiler qatnastı.
Pursattan paydalanıp, Birlesken Arab Ámirlikleri ádillik ministriniń orınbasarı Abdulaziz al-Raisiy menen sáwbetlesip, bul forumnan kútilip atırǵan nátiyjeler hám Ózbekstan – BAÁ birge islesiwi haqqındaǵı pikirleri menen qızıqsındıq:
– Ózbekstanǵa birinshi márte keliwim. Mámleketińizdegi reformalar itibarǵa ılayıq, bul barlıq tarawlardı qamtıp aladı hám ásirese, Byurokratiyanı saplastırıw forumınıń joqarı dárejede shólkemlestirilgeninen quwandım, – dedi Abdulaziz al-Raisiy. – Kútilgeninen de joqarı dárejede rawajlanǵan, zamanagóy hám ózine tán ortalıqtı kórdim. Modernizm, infrastruktura hám ulıwma atmosfera mámlekettiń qanshelli jedel ózgerip atırǵanınan derek beredi.
Bir sóz benen aytqanda, Ózbekstan men oylaǵanımnan da joqarı eken. Húkimet kózqarasınan da óz-ara qatnasıqlar oǵada bekkem, bul baǵdarda eki mámleket arasında kóplegen baslamalar ámelge asırılmaqta.
Ásirese, sońǵı jıllarda óz-ara isenim hám ámeliy birge islesiw sezilerli dárejede arttı. Bul tek ǵana rásmiy múnásibette emes, al biznes, investiciya, texnologiya hám insan kapitalın rawajlandırıw sıyaqlı baǵdarlarda da óz kórinisin tappaqta.
Jáne bir áhmiyetli tema – aviaqatnawlar sanı. Hár eki mámleket arasında hápte dawamında 50 den aslam reys ámelge asırıladı. Bul reysler ápiwayı qatnaw emes – olar mámleketlerimiz arasındaǵı ashıq-aydınlıq, isenim hám jedel baylanıslardıń belgisi. Turizm, biznes sóylesiwler hám adamlar háreketi mine usı baylanıslardıń kúndelikli turmıstaǵı haqıyqatlıqqa aylanǵanınan derek beredi.
Byurokratiya haqqında aytatuǵın bolsaq, biz bir-birimizden neni jaqsılaw múmkin ekenligin, xalqımız ushın ne kerek ekenligin, xızmetlerdi qalay jeńil hám nátiyjeli etiw múmkin ekenligin úyreniw imkaniyatına iyemiz. Bul eki mámleket ushın da paydalı.
Bizde qaǵıydalar hám rejeler hár qıylı, biraq maqset bir – xalqımızǵa jaqsı xızmet kórsetiw. Bul baslama BAÁde eki jıl aldın baslanǵan, sonıń ushın Ózbekstan menen ortaqlasıwımız múmkin bolǵan belgili tájiriybelerge iyemiz, bunı minnetimiz dep bilemiz.
Hár bir mámleket óziniń rawajlanıw modeline iye bolsa da, xalıq mápi ushın jumıs islew ulıwma qádiriyat bolıp esaplanadı. Biz BAÁda jolǵa qoyılǵan sistemalar, sanlastırıw, xızmetlerdi avtomatlastırıw hám puqaralarǵa oraylasqan qatnas boyınsha jetiskenliklerimizdi Ózbekstan menen bólisiwge tayarmız.
Eki mámleket basshıları xalıqları ushın jáne de jaqsı sistema hám xızmetlerdi jolǵa qoyıw jolında birgelikte háreket etpekte. Bul birge islesiw strategiyalıq sheriklik emes, al haqıyqıy doslıqtıń úlgisi, dep esaplayman. Keleshekte jáne de kóbirek birgelikte joybarlar, innovaciyalıq kózqaraslar hám xalıqlarımızdıń abadanlıǵına xızmet etetuǵın jańa baslamalar ámelge asırılatuǵınına isenemen.

Behruz XUDOYBERDIEV,
ÓzAnıń xabarshısı