Oliy Majlis Senatı Baslıǵınıń birinshi orınbasarı Sodiq Safoev basshılıǵındaǵı Ózbekstan delegaciyası Kanadaǵa rásmiy saparı dawamında nátiyjeli ushırasıwlar ótkerdi.

Kanada Senatınıń Spikeri Raymond Gane menen ushırasıwda eki mámleket parlamentleri arasında turaqlı sóylesiwdi jolǵa qoyıw, birge islesiwdi sistemalı túrde keńeytiw hám birgeliktegi baslamalardı alǵa qoyıw máseleleri dodalandı.
Senatorlar S.Ataullaxjan hám M.Ravalia menen bolıp ótken ushırasıwda parlament diplomatiyası, insan huqıqları, gender teńlik, migraciya hám qáwipsizlik máseleleri boyınsha tájiriybe almasıw perspektivaları kórip shıǵıldı.
Kanada parlamenti Jámáátler palatasınıń Spikeri F.Skarpaledja menen ushırasıwda nızamshılıq tarawında tájiriybe almasıw hám birgeliktegi ekspertler sóylesiwin shólkemlestiriw boyınsha pikir alısıldı.
Kanada parlamentinde “Ózbekstan kúni” shólkemlestirildi. Ózbekstan delegaciyası tárepinen ekonomikalıq reformalar, investiciyalıq ortalıqtaǵı ózgerisler, hayal-qızlar hám jaslardı qollap-quwatlaw siyasatı, jasıl energetika hám innovaciyalar baǵdarındaǵı jańa baslamalar haqqında tolıq maǵlıwmat berildi.
Kanada parlamenti aǵzaları Ózbekstannıń keyingi jıllarda erisken jetiskenliklerin joqarı bahalap, eki mámleket arasındaǵı doslıq hám birge islesiwdi bunnan bılay da bekkemlewge tayar ekenin bildirdi.
Toronto qalasında jumıs alıp barıp atırǵan bir qatar shólkemlerde ushırasıwlar ótkerildi. Ontario universitetleri keńesiniń prezidenti S.Orsini menen bolıp ótken sóylesiwler dawamında Ózbekstan hám Kanada joqarı bilimlendiriw mákemeleri tárepinen birgeliktegi bilimlendiriw baǵdarlamaların jolǵa qoyıw, muǵallimler hám studentler almasıwın keńeytiw, ilimiy-izertlew joybarların qollap-quwatlaw máseleleri kórip shıǵıldı.
“Vector Institute” basshıları menen ushırasıwda jasalma intellekt, maǵlıwmatlardı tallaw, kiberqáwipsizlik, IT-bilimlendiriw hám innovaciyalıq izertlewler boyınsha birge islesiw, ózbekstanlı jaslardı zamanagóy texnologiyalar tarawına tartıw boyınsha anıq usınıslar islep shıǵıldı.
Kanadada jasap atırǵan watanlaslar, jaslar hám studentler menen bolıp ótken ushırasıwda olardıń pikir-usınısları tıńlandı. Xalıqaralıq birge islesiw siyasatı, watanlaslar menen islesiw procesi haqqında tolıq maǵlıwmat berildi hám olar tárepinen bildirilgen usınıslar dodalandı.

Norgul ABDURAIMOVA,
ÓzA xabarshısı