Ózbekstan Respublikası Prezidentiniń 2025-jıl 22-oktyabrdegi 189-sanlı Pármanı tiykarında Qaraqalpaqstan Respublikası Ministrler Keńesiniń Baslıǵı Farxod Ermanov, Ózbekstan Respublikası Sanlı texnologiyalar ministri Sherzod Shermatov hám Qıtay Xalıq Respublikası «Shanghai LinkWise» kompaniyasınıń baslıǵı Vang Suyxu tárepinen Qaraqalpaqstan Respublikasında «Modulli intellektuallıq esaplaw orayın qurıw boyınsha Háreketler rejesi»ne qol qoyıldı.

Respublikamızda ámelge asırılıwı rejelestirilgen joybardıń ulıwma bahası 3,5 milliard AQSh dollar bolıp, ol eki basqıshta ámelge asırıladı. Atap aytqanda, joybardıń birinshi basqıshında 700 million dollar investiciya kirgizilip, qurılıs jumısları 2026-jılda baslanıwı názerde tutılǵan.
Ekinshi basqısh kelesi úsh jılǵa mólsherlengen bolıp, 2,8 milliard dollarǵa shekem qosımsha investiciyalardı óz ishine aladı. Joybardıń ekinshi basqıshı juwmaqlanǵannan soń esaplaw kompleksiniń ulıwma quwatlılıǵı 300 MVt IT-júklemege jetedi. Bul bolsa, onı regiondaǵı eń iri komplekslerdiń birine aylandıradı. Jáne bir áhmiyetli tárepi, bul joybardıń qurılısı, iske qosılıwı hám xızmet kórsetiw basqıshlarında qosımsha jumıs orınları jaratıladı. Onıń ámelge asırılıwı joqarı mamanlıqqa iye IT-qánigeler, injenerler, izleniwshilerdi tayarlaw hám olardı jumısqa tartıw, sonday-aq, regionallıq bilimlendiriw infrastrukturasın rawajlandırıw ushın xoshametlewshi faktor boladı. Respublikamız ushın bul joybar Oraylıq Aziyanıń sanlı ekonomikalıq orayın qáliplestiriw, texnologiyalıq erkinlikti arttırıw hám xalıqaralıq birge islesiwdi bekkemlew baǵdarındaǵı qádem sıpatında ayrıqsha áhmiyetke iye.
Sonı atap ótiw kerek, joybardı birgelikte ámelge asıratuǵın «Shanghai LinkWise» kompaniyası Qıtaydaǵı jasalma intellekt, keń ólshemli maǵlıwmatlar hám superkompyuter sistemaları sheshimlerine qánigelesken joqarı texnologiyalı kompaniya bolıp esaplanadı. Bul kompaniya Qıtay texnologiyalıq ekosistemasınıń jetekshileriniń biri bolıp, mámlekettiń strategiyalıq baslamalarında, sonıń ishinde, Lingang erkin sawda zonasın rawajlandırıw hám «Bir mákan, bir jol» baslaması sheńberindegi joybarlardı ámelge asırıwda qatnasıp kelmekte.
Respublikamızda ámelge asırılatuǵın bul joybar Qıtay, Meksika, Malayziya, BAÁ hám AQShta ámelge asırılıp atırǵan «LinkWise» xalıqaralıq baslamalarınıń dawamı bolıp tabıladı.

Qaraqalpaqstan xabar agentligi