Nókis qalasında hayal-qızlardıń ekonomikalıq belsendiligin arttırıwǵa, isbilermenlik hám ónermentshiliktegi qatnasına baǵıshlanǵan “Hayal-qızlar ushın sheksiz imkaniyatlar: Qaraqalpaqstan tájiriybesi” atamasındaǵı respublikalıq konferenciya bolıp ótti.

Ilajda Qaraqalpaqstan Respublikası Joqarǵı Keńesiniń Baslıǵı Amanbay Orınbaev hám Ózbekstan Respublikası Bas ministriniń orınbasarı – Shańaraq hám hayal-qızlar komitetiniń baslıǵı Zulayho Mahkamova qatnasıp, Ózbekstan Respublikası Prezidenti Sh.Mirziyoevtıń basshılıǵında elimizde hayal-qızlardı hár tárepleme qollap-quwatlaw, olardıń isbilermenlik baslamaların xoshametlew hám jaratılǵan imkaniyatlar haqqında toqtap ótti.
Atap aytqanda, sońǵı 3 jıldıń ózinde 1 mıń 400 den aslam hayal-qızlar turaq jay menen támiyinlendi. “Hayal-qızlar dápteri” baǵdarlaması sheńberinde 193 mıńnan aslam hayal-qızlarǵa jámi 292 milliard sumlıq ámeliy járdem kórsetilip, sociallıq qorǵawǵa mútáj 450 den aslam student-qızlarǵa jámi 3,5 milliard sumlıq shártnama pulları tólep berildi.
Ilaj dawamında hayal-qızlardıń isbilermenlik hám ónermentshilik ónimleriniń yarmarkası shólkemlestirilip, olardıń potencialı hám jergilikli óndirislik imkaniyatları keń jámiyetshilik itibarına usınıldı.
Konferenciya dawamında hayal-qızlardıń bántligin támiyinlew, isbilermenlik hám ónermentshilikti qollap-quwatlaw, mamanlıq hám potencialdı arttırıw jáne jańa imkaniyatlar jaratıw máseleleri dodalandı.

Qaraqalpaqstan xabar agentligi