Onıń ashılıw máresiminde Qaraqalpaqstan Respublikası Joqarǵı Keńesiniń komitet baslıǵı Sh.Otemisov hám Ózbekstan Máhálleleri awqamı Qaraqalpaqstan Respublikası basqarmasınıń baslıǵı S.Turmanovlar qatnasıp, ótkerilip atırǵan ilajdıń áhmiyetine toqtap ótip, qatnasıwshılardıń máhállelerdiń rawajlanıwındaǵı háreketlerin joqarı bahaladı.

Aymaqlar kesiminde úlgili shańaraqlar, abat awıl hám máhállelerdiń jumısı úyrenilip, tańlaw normaları boyınsha bahalandı. Ilajdıń tiykarǵı maqseti – orınlarda úlgili infrastruktura, taza hám tártipli kósheler, sonday-aq, úlgili turmıs tárizin keńnen úgit-násiyatlaw bolıp tabıladı.
Bul tańlawdıń rayonlıq hám qalalıq basqıshlarında 452 máhálle, segiz mıńnan aslam shańaraq, sonday-aq, úsh mıńnan aslam kóshe basshıları qatnasqan edi. Bul basqıshta rayon hám qala basqıshlarında jeńimpaz bolǵan 51 qatnasıwshı óz-ara bellesti. “Abat shańaraq” hám “Abat kóshe” baǵdarlarında qatnasıwshılar tóreshiler quramı tárepinen qalıs bahalanıp, jeńimpazlar anıqlandı.
“Abat shańaraq” baǵdarı boyınsha 1-orın Kegeyli rayonındaǵı «Gújim terek» máhállesinen Zamira Sagidullaeva, Rustam Qoylıbaev, 2-orın Shımbay rayonındaǵı «Berdaq» máhállesinen Miywash Tórenazarova, 3-orın Qaraózek rayonındaǵı «Jańa Qaraózek» máhállesinen Orazalı Sársenbaevlarǵa berildi.
“Abat kóshe” baǵdarı boyınsha 1-orındı Kegeyli rayonındaǵı «Mádeniyat» máhállesinen Marat Dawletmuratov, 2-orındı Nókis rayonındaǵı «Úlgili mákan» máhállesinen Jumamurat Kalilaev, 3-orındı Ellikqala rayonındaǵı «Qırıqqızabad» máhállesinen Dastanbek Adambaevlar jeńip aldı.
Al, “Abat máhálle” baǵdarı boyınsha 1-orın Kegeyli rayonındaǵı «Mádeniyat» máhállesiniń baslıǵı Lizaxan Urazbaeva, 2-orın Nókis rayonındaǵı «Diyqan arna» máhállesiniń baslıǵı Marat Aminov, 3-orın Qońırat rayonındaǵı «Qańlı» máhállesiniń baslıǵı Ziliyxa Seydullaevalarǵa nesip etti.
Jeńimpazlar hám sıylı orın iyeleri tańlaw shólkemlestiriwshileri tárepinen sıylıqlandı. Ilaj kórkem óner sheberleriniń atqarıwındaǵı koncert baǵdarlaması menen dawam etti.

Á.Jiyemuratov,
Qaraqalpaqstan xabar agentligi