Qaraózek rayonı hákimliginde Ózbekstan Respublikası Oliy Majlisi Senatınıń Byudjet hám ekonomikalıq máseleler boyınsha komiteti hám Xalıq deputatları rayonlıq Keńesiniń qospa májilisi ótkerildi.

Májiliske Senattıń komitet baslıǵı E. Gadoev, komitet baslıǵınıń orınbasarı Q. Tursunov, Qaraqalpaqstan Respublikası Joqarǵı Keńesiniń komitet baslıǵı B.Seytnazarov, Ministrler Keńesi Baslıǵınıń birinshi orınbasarı N.Erlepesov, ministrlikler, rayonlıq mákeme, shólkemler basshıları hám ǵalaba xabar qurallarınıń wákilleri qatnastı.
Májiliste Qaraózek rayonında bántlikti támiyinlew hám kámbaǵallıqtı qısqartıw baǵdarında belgilengen wazıypalardıń orınlanıwı boyınsha islengen jumıslar hár tárepleme kórip shıǵıldı. Atap aytqanda, rayon aymaǵında jumıssızlıq hám kámbaǵallıqtı saplastırıw baǵdarında qarar hám mámleketlik baǵdarlamalardıń orınlanıw barısı talıqlanıp, tiyisli uyımlardıń esabatı, senator hám deputatlardıń pikir hám usınısları tıńlanıp, aldaǵı wazıypalar belgilendi.
Májilis sońında miymanlar, rayondaǵı Jańa Qaraózek posyolkalıq puqaralar jıyını gidroponika usılında shólkemlestirilgen ıssıxana jumısları menen tanıstı.
Bunnan soń topar aǵzaları Mádeniyat awıl puqaralar jıyınında bolıp, bul jerde máhálle jetiligi menen ushırasıp, aymaqtaǵı islenip atırǵan jumıslar hám imkaniyatlar boyınsha keńnen pikir alıstı.

Qaraqalpaqstan xabar agentligi