Kópshiliktiń xabarı bolǵanınday, sońǵı jılları respublikamızda hayal-qızlar gúresi keńnen en jayıp, jaslaramız arasında bul sport túri menen shuǵıllanıwshılar sanı kóbeyip barmaqta. Quwanıshlı tárepi sonda, bul jaslar arasınan Ózbekstan, Aziya hám jáhán chempionları, Olimpiada oyınlarınıń qatnasıwshıları ósip jetilispekte.

Ásirese, bunda 2018-jılı 20 jasqa shekemgi jaslar arasında ótkerilgen jáhán chempionatı, 2021-jılı Túrkiyada ótkerilgen Islam tilekleslik oyınlarınıń gúmis medalları iyesi, 2022-jılı 23 jasqa shekemgi Aziya chempionatınıń jeńimpazı, eresekler arasında 2019, 2020, 2023-jılları ótkerilgen Aziya birinshiligi hám Qıtaydıń Xanchjou qalasında bolıp ótken Aziya oyınlarınıń qola medalı iyesi, «Ózbekstan Respublikasına xızmet kórsetken sportshı» Aqteńge Kewnimjaevanıń tutqan ornı ayrıqsha.
Jaqında ol Saudiya Arabstanınıń Ar-Riyad qalasında ótkerilgen VI Islam tilekleslik oyınlarında da xalqımızdı quwanıshqa bólep, chempion bolǵan edi. Al, onıń izbasarları bolǵan, Kamila Abatbaeva, Ulbosın Álimbaeva, Nafisa Shamuratova, Ulbosın Qádirbergenova, Rabiya Turdımuratova, Sabohat Jollıbaeva, Sisagul Sarsenbaeeva, Shaxsánem Tóreniyazova, Feruza Kayratdinova hám Feruza Smetovalar «Prezident Olimpiadası» 1 altın, 4 gúmis hám 5 qola medalların qolǵa kirgizip, respublikamız abırayın múnásip túrde qorǵadı.
Búgin Nókis Temir jol vokzalında xalıqaralıq dárejedegi sport sheberi Aqteńge Kewnimjaeva hám onıń kishkene jetkinshekleri Qaraqalpaqstan Respublikası Sport ministrligi hám keń jámiyetshilik wákilleri tárepinen saltanatlı túrde kútip alındı.
Onda Qaraqalpaqstan Respublikası Sport ministriniń orınbasarı Azamat Qalbaev shıǵıp sóylep, sportshılarımızdı erisken úlken tabısları menen qutlıqlap, palwan qızlarımızǵa gúldástelerin hám estelik sawǵaların tapsırdı.
Óz gezeginde sportshılar hám olardıń trenerleri ózlerine kórsetilip atırǵan joqarı húrmet hám itibar ushın shólkemlestiriwshilerge raxmetler aytıp, aldaǵı waqıtları da elimiz bayraǵın kóklerde jelbiretiwge wáde berdi.

Adilbay Orazov,
Qaraqalpaqstan xabar agentligi sholıwshı