Qaraqalpaqstan Respublikası Ayrıqsha jaǵdaylar basqarması basshılıǵında shólkemlestirilgen arnawlı jumısshı topar 2025-2026-jıllar gúzgi-qısqı máwsimine tayarlıq dárejesin úyreniw ushın keń kólemli tekseriwler alıp bardı. Onda energetika hám kommunallıq xızmetler shólkemleri turaqlı islewge tayarlanǵanı, qıs máwsimindegi avariyalardıń aldın alınǵanı, júz bergen jaǵdaylarda bolsa olardıń aqıbetleri jedellik penen saplastırılıwı hám avariyalıq tiklew toparlarınıń háreketleniw nátiyjeliligi tallandı.

Nókis qalasında ótkerilgen qadaǵalaw ilajları sheńberinde “Hududgaz Qoraqalpoǵiston” GTF Nókis gaz toltırıw stanciyasınıń jumısı hám gúzgi-qısqı máwsimge tayarlıǵı tekserildi. Náwbetshi-dispetcherlik xızmetleri, avariya-tiklew brigadaları hám rezerv saqlaw qoymaxanalarınıń jaǵdayı da ayrıqsha úyrenildi. Sonday-aq, Stanciyanıń arnawlı injenerlik texnikalarınıń tayarlıq jaǵdayı tekserildi. Stanciya 100 mıń 489 xojalıqqa hám 121 ulıwma orta bilim beriw mektebine xızmet kórsetip kelmekte.
Jumısshı topar juwapker uyımlardıń texnikalıq jaqtan turaqlılıǵı, arnawlı texnika hám zárúr materiallar rezervin tekserdi, sistemalar hám qurılmalardıń jaǵdayın bahaladı.
– Úyreniwler procesinde anıqlanǵan kemshilikler hám mashqalalardı saplastırıw boyınsha anıq ilajlar belgilendi, – deydi Ayrıqsha jaǵdaylar basqarması baslıǵı, podpolkovnik A.Davletov. – Sonday-aq, avariya-tiklew hám múrájatlardı saplastırıw sisteması qayta qadaǵalawdan ótkerildi, operativ háreket toparlarınıń náwbetshiligi kúsheytildi. Juwapkerlerge texnikalıq jaqtan bekkemleniw hám ayrıqsha jaǵdaylarǵa tayarlıqtı arttırıw boyınsha qosımsha tapsırmalar berildi.
Juwapkerlerdiń atap ótiwinshe, turaqlı energiya támiynatı hám ısıtıw sistemalarınıń nátiyjeli islewi xalıqtıń turmısı hám ekonomikalıq jumısı ushın sheshiwshi áhmiyetke iye. Sonlıqtan, gúzgi-qısqı máwsimde hár qanday ayrıqsha jaǵdaylarǵa tez hám nátiyjeli juwap beriw, xalıqqa qáwipsiz xızmet kórsetiw máseleleri turaqlı qadaǵalawda boladı.

Qaraqalpaqstan xabar agentligi