Xabar bergenimizdey, Tashkentte Ózbekstan ipotekanı qayta qarjılandırıw kompaniyası tárepinen Ekonomika hám qarjı ministrligi, Oraylıq bank hám Aziya rawajlanıw banki menen birgelikte “Jasıl hám qolaylı turaq jay” xalıqaralıq forumı ótkerildi.

Forum sheńberinde Evropa tikleniw hám rawajlanıw banki (ETRB) Ózbekstan Ipotekanı qayta qarjılandırıw kompaniyasına (IQQK) milliy valyutada 40 million dollarǵa shekemgi muǵdarda sintetikalıq kredit ajıratıwdı maqulladı.
Bul haqqında Ózbekstan ipotekanı qayta qarjılandırıw kompaniyasınıń baspasóz xızmeti ÓzAǵa málim etti.
Maǵlıwmat ornında aytıw kerek, Ózbekstan ipotekanı qayta qarjılandırıw kompaniyası 2019-jılı mámleketlik hám jergilikli banklerdiń qatnasıwında shólkemlestirilgen, ipotekanı qayta qarjılandırıw boyınsha birden-bir milliy institut bolıp esaplanadı. Ol subsidiyalastırılǵan ipoteka usınıs etpeydi, al ekilemshi ipoteka bazarınıń agregatorı sıpatında kommerciyalıq banklerge uzaq múddetli qarjı ajıratıp, xalıqtı alternativ hám turaqlı ipoteka kreditleri menen támiyinlewge járdemlesedi.
Evropa tikleniw hám rawajlanıw bankiniń bul krediti Ózbekstan ipotekanı qayta qarjılandırıw kompaniyasına milliy valyutada turaqlı hám úzliksiz qarjılandırıw deregin jaratıp, Ózbekstanda kommerciyalıq jaqtan turaqlı, standartlastırılǵan ipoteka bazarın rawajlandırıwǵa xızmet etedi. Sonıń menen birge, jeke menshik sektordıń qatnasın keńeytiw arqalı ipoteka kreditleriniń qamtıp alınıwın arttırıwǵa járdem beredi.
Kredit qarjılarınıń úlken bólegi “jasıl renovaciya” baǵdarlamasına baǵdarlanadı. Bul baǵdarlama arqalı turaq jaylardı energiya únemlewshi hám klimat ózgerislerine shıdamlı jaǵdayǵa keltiriw rejelestirilgen. Sonıń ishinde, ısıtıw sistemaların jańalaw, ayna hám esiklerdi almastırıw, kondicionerler ornatıw, quyash panelleri hám basqa da turaqlı energiya úskenelerin engiziwge qaratıladı.
Evropa tikleniw hám rawajlanıw bankiniń krediti Ózbekstan ipotekanı qayta qarjılandırıw kompaniyasına kommerciyalıq banklerge milliy valyutada uzaq múddetli qarjı usınıw imkaniyatın jaratadı. Bul ipoteka bahalı qaǵazları bazarına (BQB) shıǵıwdan aldınǵı waqıtsha qarjı jetispewshiligin saplastırıwǵa xızmet etedi.
Joybar, sonday-aq, ipoteka portfellerin birden-bir standartlar tiykarında birlestiriw hám keleshekte ipotekaǵa tiykarlanǵan bahalı qaǵazlardı qáliplestiriw arqalı Ózbekstan kapital bazarınıń rawajlanıwına tiykar jaratadı.

Shahnoza Mamaturopova, ÓzA