Taxtakópir rayonı Mektepke shekemgi hám mektep bilimlendiriw bólimine qaraslı 1-sanlı ulıwma orta bilim beriw mektebinde 1-dekabr – Qaraqalpaqstan Respublikasınıń “Mámleketlik til haqqında”ǵı Nızamı qabıl etilgenliginiń 36 jıllıǵı múnásibeti menen “Ana tilim – birligimiz nıshanı” atamasında qaraqalpaq tili hám ádebiyatı páni muǵallimleri arasında tańlaw ótkerildi.

Tańlaw dawamında pedagoglar ana tilimizge baylanıslı ózleriniń iyelegen bilimlerin, sóylew mádeniyatın, dóretiwshilik qatnasların hám sheberligin kórsetetuǵın hár qıylı baǵdarlardaǵı shıǵıwları menen qatnasıp, olardıń bilim hám sheberlikleri tóreshiler quramı tárepinen bahalanıp barıldı.
Ótkerilgen tańlaw shártleri sońında, jeńimpaz muǵallimler Ózbekstan bilimlendiriw hám ilim xızmetkerleri kásiplik awqamı Taxtakópir rayonlıq bóliminiń Húrmet jarlıǵı hám estelik sawǵaları menen sıylıqlandı.
Shólkemlestirilgen bul tańlaw muǵallimlerdiń dóretiwshilik potencialın júzege shıǵarıw, mámleketlik tilimizdiń jámiyettegi ornın jáne de bekkemlew hám ruwxıy ortalıqtı bayıtıwda úlken áhmiyetke iye boldı.

Qaraqalpaqstan xabar agentligi