Jasırarlıǵı joq sońǵı waqıtları respublikamızda hawa-rayınıń geyde suwıtıp, geyde jılıtıp ketiwiniń nátiyjesinde adamlar arasında gripp, ótkir respirator viruslı infekciya kessellikleri háwij alıp, ol kem-kemnen kóbeyip barmaqta.

Bul álbette, kópshilik jámiyetshiligimizdi oylandırıp, adamlarda hár qıylı pikirlerdiń payda bolıwına sebep bolmaqta. Xalqımız arasında payda bolıp atırǵan sorawlarǵa juwap tabıw maqsetinde, Ózbekstan jurnalistler awqamı Qaraqalpaqstan bólimi hám Qaraqalpaqstan Respublikası Densawlıqtı saqlaw ministrliginiń shólkemlestiriwi menen Respublikalıq juqpalı kesellikleri emlewxanasında ǵalaba xabar quralları xızmetkerleri ushın baspasóz ánjumanı shólkemlestirildi.
Onda Qaraqalpaqstan Respublikası Densawlıqtı saqlaw ministrliginiń málimleme xızmeti boyınsha bas qánigesi Gúlzar Jumaǵulova, Respublikalıq juqpalı kesellikleri emlewxanası bas shıpakerniń orınbasarı Jumagúl Bostanovalar shıǵıp sóylep, sońǵı waqıtları balalar arasında baqlanıp atırǵan gripp, ótkir respirator viruslı infekciyalar kessellikler haqqında keń túrde aytıp ótip, olardıń aldın alıw hám emlew boyınsha alıp barılıp atırǵan jumıslar jóninde ilaj qatnasıwshılarına maǵlıwmatlar berdi.
– Ózbekstan Respublikası Bas mámleketlik Sanitariya Shıpakeriniń 2025-jıl 26-sentyabrdegi 01-19/9288-sanlı qararına muwapıq, Respublikada 2025-2026-jılları epidemiyalıq máwsimde xalıq arasında gripp, ótkir respirator viruslı infekciyalar (ÓRVI) hám koronavirus infekciyası COVID-19 tarqalıwınıń aldın alıw boyınsha sanitariya-gigienalıq, profilaktikalıq hám epidemiyaǵa qarsı ilajlardı ámelge asırıw maqsetinde, Qaraqalpaqstan Respublikası Densawlıqtı saqlaw ministriniń 2025-jıl 29-sentyabr hám 13-noyabr kúnleri 199-sanlı hám 240-sanlı buyrıqları shıǵarıldı hám búgingi kúni respublikamızda bul hújjetlerdiń orınlanıwı támiyinlenbekte, – deydi ministrliktiń Málimleme xızmeti boyınsha bas qánigesi Gúlzar Jumaǵulova.
– Emlewxanamız 120 orınǵa mólsherlengen bolıp, onıń 65 ornı balalar, 55 ornı eresek jastaǵı adamlarǵa arnalǵan, – deydi Respublikalıq juqpalı kesellikleri emlewxanası bas shıpakerniń orınbasarı Jumagúl Bostanova. – Ministrliktiń joqarıda aytıp ótken buyrıǵı tiykarında, xalıq arasında gripp, ótkir respirator viruslı infekciyalar menen keselleniw kóbeyiwin inabatqa alıp, emlewxanamızda 65 qosımsha orın shólkemlestirildi hám nawqaslardıń kesellik jaǵdaylarına qaray olar medicina xızmetkerleri tárepinen emlenbekte. Búgingi kúni adamlar arasında gonkong grippi degen sózler tarqalmaqta. Biraq, bizler bunı anıq sol dep ayta almaymız. Sebebi, bizler nawqaslardan alǵan analizlerimizdi Qaraqalpaqstan Respublikası Sanitariya-epidemiologiyalıq tınıshlıq hám jámiyet salamatlıǵı basqarmasına tekseriwge jiberemiz hám ol jaqtan analizdiń juwmaǵı tiykarında bul qanday kesellik ekenligi anıqlanadı. Házirshe bizlerge bunday maǵlıwmat kelmedi hám sonlıqtan házirgi kúni xalqımız arasında ushırasıp atırǵan kesellikti gonkong grippi dep ayta almaymız. Sonıń ushın shıpakerlerimiz nawqaslardı gripp keseli sıpatında belgilengen standart boyınsha emlep atır. Ásirese, nawqaslarımızda bul kesellik dene temperaturasınıń kóteriliwi, qurǵaq jótel, tımaw menen baslanıp, kishkene balalarımızda ish ótiwi de gúzetilmekte. Bizler qurǵaq jóteldi toqtatıw ushın tamaqtaǵı qaqırıqtı túsiriwshi dáriler bersek, ol tásir etemen degenshe dáwir ótkir hám sozılmalı bolıp ketpekte. Burın bizler grippti 5-7 kúnde emleymiz dep aytatuǵın edik. Házirgi kúndegi gripplerde nawqaslardıń bronxo bezleri isip, olar arasında bronxit kóbeyip, onıń izi pnevmoniyaǵa aylanıp barmaqta. Sonlıqtan puqaralarımızdan gripp keselligine itibarsız bolmastan, jeke gigiena qaǵıydaları hám awqatlanıw rejimine ayrıqsha dıqqat qaratıwın sorap qalamız. Sonday-aq, adamlarımız ózlerinde gripp keselliginiń simtomın sezse, ózlerinshe em almastan, aymaqlıq shıpakerlerdiń tekseriwinen ótip, olardan másláhát alsa eken deymen.
Ótkerilgen baspasóz ánjumanında jurnalistler tárepinen shıpakerlerge búgingi kúni keń jámiyetshilikti qızıqtırıp júrgen máseleler boyınsha sorawlar berilip, olarǵa juwaplar aldı.

Adilbay Orazov,
Qaraqalpaqstan xabar agentligi sholıwshı