Keyingi jılları Ózbekstanda gidroenergetika tarawın jedel rawajlandırıw, jańa elektr stanciyaların qurıw hám bar infrastrukturanı modernizaciyalaw boyınsha keń kólemli reformalar ámelge asırılmaqta.

Mámleketimizdiń turaqlı rawajlanıwında áhmiyetli orın iyeleytuǵın bul baǵdar xalıqaralıq jámiyetshiliktiń itibarınan da shette qalmadı. Ásirese, Evropa málimleme maydanında abırayǵa iye bolǵan “Euronews” telekanalı sońǵı waqıtları Ózbekstandaǵı gidroenergetika jańalıqların, tabıslı ámelge asırılıp atırǵan joybarlar hám tarawdıń rawajlanıwın turaqlı sáwlelendirip kelmekte.
Jaqında usı kanal tamashagóyleri mámleketimizde iske túsirilgen iri gidroenergetikalıq obektler haqqında tayarlanǵan arnawlı analitikalıq videoroliklerdi efirge berdi.
Ózbekstannıń jańa gidroenergetika potencialın sáwlelendiriwshi videokórinisler, xalıqaralıq auditoriyaǵa usınılmaqta. Materiallar mámleketimizde qurılıp atırǵan zamanagóy, ekologiyalıq taza energiya derekleri haqqında obektiv hám xoshametlewshi málimlemeni jetkeriwge xızmet etpekte.
Itibar orayında bolǵan joybarlardan biri – jaqında iske qosılǵan “Narın” milliy GESi bolıp esaplanadı. Videokóriniste usı stanciyanıń mámlekettiń energetika qáwipsizligin támiyinlewdegi ornı, onıń texnikalıq ústinlikleri hám óndirislik quwatlıqları hár tárepleme sáwlelendirilgen.
Sonday-aq, kóriniste Oraylıq Aziyada birden-bir gidroturbina hám gidrotexnikalıq úskeneler islep shıǵarıwshı “Uzhydropower” zavodınıń jumısı haqqında da tolıq maǵlıwmat beriledi. Bul kárxana Narın GESi ushın zárúr ásbap-úskeneler tayarlaǵanı hám jergilikli sanaattıń potencialı artıp atırǵanı ayrıqsha atap ótilgen.
Videokórinislerde jaqın keleshekte iske túsiriliwi kútilip atırǵan áhmietli energiya derekleri, sonıń ishinde, xalıqaralıq grant joybarı sheńberinde ámelge asırılıp atırǵan “CHorvoq” samal elektr stanciyası da tilge alınadı. Bul joybar mámlekettiń qayta tikleniwshi energiya úlesin sezilerli dárejede arttırıwǵa xızmet etiwi kútilmekte.
Sońǵı jıllarda Ózbekstanda gidroenergetika baǵdarında ámelge asırılıp atırǵan reformalardı tallaw sonnan derek beredi, mámleket turaqlı rawajlanıw jolında isenimli qádem taslamaqta. Jańa GESler, modernizaciya jumısları hám samal energiyasına baylanıslı joybarlar energetika sistemasın bekkemlew menen birge, qorshaǵan ortalıqtı qorǵaw, energiya jetispewshiligin azaytıw hám xalıqqa taza elektr energiyasın jetkerip beriw sıyaqlı áhmiyetli strategiyalıq maqsetlerge xızmet etpekte.
Búgingi izbe-iz reformalar nátiyjesinde Ózbekstan ekologiyalıq taza energiya islep shıǵarıw boyınsha regionda jetekshi mámleketlerden biri sıpatında qáliplesip barmaqta. Sonıń menen birge, tarawǵa baylanıslı keń kólemli jarıtıwlar mámleketimizdiń xalıqaralıq imidjin jáne de bekkemlewge xızmet etpekte.

N.Ziyodullaeva tayarladı,
ÓzA