Ámiwdárya rayonı hákimliginde miynet migraciyası máselelerin úyreniw, qáwipsiz mexanizmlerdi jáne de bekkemlew hám puqaralardıń sırt eldegi huqıqıy qorǵalıwın kúsheytiw maqsetinde “Qáwipsiz, tártipli hám nızamlı miynet migraciyası sisteması” atamasında keń kólemli seminar bolıp ótti.

Ilajda Ózbekstan Respublikası Ministrler Kabineti janındaǵı Migraciya agentligi basqarma baslıǵı Sh.Hakimov, agentliktiń Qaraqalpaqstan Respublikası filialı baslıǵı A.Achilov, rayondaǵı 49 máhálle jetiligi hám tiyisli shólkemlerdiń wákilleri qatnastı.
Seminarda Migraciya agentliginiń tiykarǵı baǵdarları tolıq túsindirildi. Atap aytqanda, miynet migraciyası processlerin nátiyjeli basqarıw, sırt elde jumıs islep atırǵan puqaralardı esapqa alıw hám olardıń jaǵdayın monitoring etiw, sırt eldiń abıraylı shólkemleri menen waqtınsha miynet jumısı boyınsha birge islesiwdi rawajlandırıw, Ózbekstannıń diplomatiyalıq wákilxanaları menen óz-ara birge islesiwdi keńeytiw, sırt eldegi ózbek diasporaları menen baylanıslardı bekkemlew, puqaralardıń miynet huqıqların qorǵaw boyınsha jańa mexanizmlerdi engiziw sıyaqlı principler agentlik jumısınıń tiykarın quraytuǵını ayrıqsha atap ótildi.
Búgingi dáwirde migraciya processlerin nızamlastırıw, hár bir puqaranıń miynet etiwin qáwipsiz shólkemlestiriw úlken áhmiyetke iye ekeni, bul baǵdarda mámleket tárepinen keń kólemli sistemalı reformalar ámelge asırılıp atırǵanı atap ótildi.
Seminar dawamında Migraciya agentligi tárepinen ámelge asırılıp atırǵan, bántlikti qollap-quwatlaw boyınsha kompleksli processler haqqında da tolıq maǵlıwmat berildi. Oǵan bola, sırt ellerde jumıs beriwshiler menen shártnamalar dúziw, sırtqı miynet migraciyasına shıqpaqshı bolǵan puqaralardı anıqlaw hám dizimge alıw, olardı kásipke hám shet tillerine oqıtıw, jumıs procesinde monitoring alıp barıw, puqaralarǵa sociallıq hám huqıqıy járdem kórsetiw sıyaqlı baǵdarlar miynet bazarınıń talaplarınan kelip shıǵıp ámelge asırılmaqta.
Bul baǵdarda máhálle jetilikleriniń belsene qatnasıwı, shańaraqlarǵa kirip barıp atırǵanı, xalıq penen júzbe-júz sóylesiwler arqalı mashqalalardı anıqlaw jumısları da jańa sistemanıń nátiyjeliligin arttırmaqta.
– 2025-jıldıń yanvar-sentyabr aylarında Migraciya agentligi tárepinen 156 mıń puqaraǵa huqıqıy, materiallıq hám sociallıq járdem kórsetildi, – deydi Migraciya agentligi Sırt el wákilxanaları jumısın muwapıqlastırıw hám puqaralar máplerin qorǵaw basqarması baslıǵı Shahruz Hakimov. – Sırt eldegi jumıs beriwshiler tárepinen 1,8 million AQSh dolları muǵdarındaǵı qarızdarlıqlar óndirildi hám puqaralarǵa jetkerildi. 352 watanlasımızdıń shaxsın tastıyıqlawshı hújjetleri qaytarıp alınıp, 46,8 mıń puqara sociallıq járdemler menen támiyinlendi hám 3,7 mıń puqaraǵa materiallıq járdem berildi. Bul nátiyjeler miynet migraciyasınıń tártipke salınǵan, nızamlı hám eń áhmiyetlisi, qáwipsiz bolıwı jolında ámelge asırılıp atırǵan izbe-iz jumıslardıń ámeliy tastıyıǵı bolıp esaplanadı.
Seminarda atap ótilgenindey, miynet migraciyasın durıs jolǵa qoyıw – bul tek ǵana mámleketlik uyımlardıń wazıypası emes, al máhálle jetiliginen baslap, hár bir juwapker shólkemniń birgeliktegi háreketlerin talap etedi.
Ámiwdáryada ótkerilgen bul ushırasıw da xalıq hám mámleket arasındaǵı óz-ara sóylesiwdi jáne de kúsheytiwge, puqaralardıń sırt elde miynet etiwin nızamlı tiykarda shólkemlestiriwge xızmet etedi. Seminarda bildirilgen pikir hám usınıslar bolsa miynet migraciyasınıń jáne de qáwipsiz, tártipli hám sistemalı bolıwına bekkem tiykar jaratadı.

Qaraqalpaqstan xabar agentligi